Dani Alves rikthehet në rrjetet sociale
Ish-lojtari i Barcelonës, Dani Alves, ka bërë postimet e tij të para në rrjetet sociale në më shumë se një vit, por i ka mbyllur komentet, pas dënimit të tij për përdhunim.
40-vjeçari, i cili ka apeluar një dënim prej katër vitesh e gjysmë burg, pasi u shpall fajtor për përdhunim, u lirua nga burgu në fund të muajit të kaluar pasi vendosi garancinë e tij me kusht prej 1 milion eurove. Këtë javë ai u rikthye në Instagram për herë të parë që nga janari 2023 me dy postime, ndërsa ka mbyllur komentet.
Ish-ylli i Paris Saint-Germainit dhe Barcelonës bëri një postim me një perëndim të diellit me pamje nga deti dhe i dyti ishte një vepër arti. Të dy postimet mblodhën më shumë se 100,000 pëlqime nga 36.5 milionë ndjekësit e tij në Instagram.
Alvesi, i cili ka vuajtur 14 muaj burg për përdhunimin e një gruaje në dhjetor 2022, ka dorëzuar pasaportën e tij spanjolle dhe braziliane dhe duhet të shkojë në gjykatë një herë në javë për të ruajtur lirinë e tij. /Zëri
