Kapet arsenal armësh në Podujevë, një person përfundon në mbajtje

Një operacion i Policisë së Kosovës ka çuar në sekuestrimin e katër pushkëve automatike AK-47, nëntë karikatorëve dhe 262 fishekëve në Podujevë, ndërsa një person është dërguar në mbajtje.

Sipas raportit të Policisë, rasti nisi më 25 qershor 2026, pas pranimit të informatave dhe ndërmarrjes së veprimeve hetimore. Gjatë kontrollit të një porosie të dërguar përmes një agjencie turistike, u gjetën dhe u sekuestruan katër armë AK-47, nëntë karikatorë, 262 fishekë dhe dy dritare plastike.

Hetimet vazhduan edhe më 2 korrik 2026, kur policia shoqëroi për intervistim dy persona, shtetas të Kosovës. Me urdhër të prokurorit, u bastis edhe një shtëpi, ku u gjetën dhe u sekuestruan tri pjesë të një arme AK-47 dhe një kondak pushke prej druri.

Pas intervistimit, me vendim të prokurorit kompetent, njëri nga të dyshuarit është dërguar në mbajtje, ndërsa hetimet për rastin po vazhdojnë.