Gjobiten 61 persona për shkelje të ndryshme në trafik në Ferizaj

Njësia e Motoçikletave në kuadër të Njësisë së Komunikacionit Rrugor, e cila vepron në tërë territorin e Rajonit të Ferizajt, përfshirë komunat Ferizaj, Kaçanik, Shtime, Shtërpcë dhe Hani i Elezit, ka vazhduar aktivitetet në funksion të rritjes së sigurisë në trafikun rrugor.

Gjatë javës së kaluar, pjesëtarët e kësaj njësie kanë shqiptuar gjithsej 61 tiketa për kundërvajtje në trafik.

Nga numri i përgjithshëm i masave të shqiptuara:

- 12 për mosrespektim të shenjave të trafikut;

- 8 për përdorim të telefonit gjatë drejtimit të automjetit;

- 7 për mosmbajtje të distancës së sigurisë;

- 5 për shkelje të rregullave të peshores nga shoferët e kamionëve

- 29 për kundërvajtje të tjera.

Policia Rajonale e Ferizajt apelon te të gjithë pjesëmarrësit në trafik që të respektojnë rregullat dhe shenjat e komunikacionit, të mbajnë distancën e sigurisë dhe të shmangin përdorimin e telefonit gjatë drejtimit të automjetit.

“Kujdesi, përqendrimi dhe respektimi i rregullave të trafikut shpëtojnë jetë. Udhëtoni me përgjegjësi dhe kontribuoni për një trafik më të sigurt për të gjithë”, thekson Policia. /Zëri