Kosova dhe Maqedonia e Veriut, shkëmbim mallrash prej 207 milionë eurove

Kosova dhe Maqedonia e Veriut, shkëmbim mallrash prej 207 milionë eurove

Ekonomia July 25, 2022 - 08:39

Ndonëse produktet e Kosovës tash e sa kohë kanë nisur të plasohen në tregjet rajonale dhe ato evropiane, Kosova vazhdon të importojë më shumë sesa që eksporton.

Me vendin fqinj, Maqedoninë e Veriut, vetëm për 6 muajt e parë të këtij viti janë realizuar 207 milionë euro shkëmbime tregtare. Por edhe me këtë vend Kosova më shumë importoi sesa që eksportoi.

Republika e Kosovës është partner i rëndësishëm tregtar për Maqedoninë e Veriut dhe vlerësohet si një ndër vendet me këmbimin më të madh tregtar për vendin tonë fqinj.

Drejtori ekzekutiv i Odës Ekonomike të Maqedonisë Veriperëndimore, Drilon Iseni, në një deklaratë dhënë për RTK-në tha se në gjysmën e parë të këtij viti 207 milionë euro është këmbimi tregtar mes këtyre dy vendeve.

Iseni vlerëson se Maqedonia e Veriut eksporton më shumë në Kosovë sesa po importon.

Infrastruktura rrugore e rregulluar së fundmi ka ndikuar edhe më shumë në shkëmbime tregtare, gjë që sipas Isenit e ka bërë më të qasshëm tregun e Maqedonisë se Veriut. Sipas tij, ndërtimi i autostradës Shkup - Bllacë dhe ndërtimi i terminali doganor në Jazhincë do ta lehtësonin edhe më shumë lëvizjen e lirë të mallrave.