Hansi Flick nis ndjekjen e historisë, Barcelona synon titullin e tretë radhazi në La Liga

Hansi Flick ka hapur një kapitull të ri në historinë e Barcelonës. Trajneri gjerman e nisi mbrojtjen e titullit në La Liga me një fitore bindëse 5-0 ndaj Elches, duke hedhur hapin e parë drejt një arritjeje që në klub e kanë realizuar vetëm dy prej trajnerëve më legjendarë.

Sipas gazetës spanjolle “Mundo Deportivo”, Flick synon ta fitojë kampionatin për të tretin sezon radhazi, diçka që më parë me Barcelonën e kanë bërë vetëm Johan Cruyff dhe Pep Guardiola.

Tre sezone, tri nisje me fitore

Flick e nisi sezonin e tij të parë në La Liga me një fitore 2-1 ndaj Valencias.

Në sezonin e dytë, Barcelona triumfoi 3-0 ndaj Real Mallorcas, ndërsa këtë herë e hapi kampionatin me një paraqitje edhe më të fuqishme, duke e mposhtur Elchen 5-0.

Kështu, trajneri gjerman vazhdon traditën e nisjeve të forta dhe njëkohësisht konfirmon ambicien për të ruajtur dominimin e Barcelonës në futbollin spanjoll.

Guardiola dhe Cruyff, objektivat historikë të Flickut

Nëse Barcelona shpallet kampione edhe këtë sezon, Flick do të barazojë arritjen e Pep Guardiolës, i cili e udhëhoqi klubin drejt tri titujve radhazi në La Liga nga viti 2009 deri më 2011.

Rekordi absolut i Barcelonës, megjithatë, vazhdon t’i përkasë Johan Cruyffit.

Holandezi fitoi katër kampionate radhazi nga viti 1991 deri më 1994, një rekord që qëndron prej më shumë se tri dekadash.

Flick, pra, ka nevojë për një tjetër titull këtë sezon për të barazuar Guardiolën, ndërsa për të arritur Cruyffin do t’i duhej ta fitonte La Ligën edhe për të katërtin vit radhazi.

Real Madridi pritet të jetë pengesa kryesore

Megjithatë, rruga drejt titullit të tretë nuk pritet të jetë e lehtë.

“Mundo Deportivo” nënvizon se Real Madridi është përforcuar ndjeshëm gjatë merkatos së verës dhe ka rikthyer José Mourinhon në stol me objektivin e qartë për të rimarrë titullin kampion.

Kjo e bën garën për La Ligën potencialisht shumë më të fortë se në sezonet e kaluara.

Barcelona jep sinjalin e parë

Fitorja 5-0 ndaj Elches ishte një paralajmërim i qartë për rivalët.

Barcelona tregoi forcë të madhe në fazën sulmuese dhe e nisi sezonin në mënyrën më bindëse të mundshme, duke i dhënë Flickut bazën ideale për një tjetër fushatë ambicioze.

Gjermani tashmë është vetëm një titull larg barazimit të Guardiolës. Nëse arrin ta mbajë Barcelonën në krye edhe këtë sezon, emri i tij do të hyjë edhe më thellë në historinë e klubit katalanas.