Barcelona gjen alternativat pas Julian Alvarezit

Barcelona po përgatitet për një skenar pa Julián Álvarez. Sulmuesi i Atlético Madridit mbetet objektiv i dëshiruar nga katalanasit, por vështirësitë për realizimin e transferimit kanë bërë që klubi të shqyrtojë alternativa të tjera.

Sipas AS, Lautaro Martínez është konsideruar si “Plan B”, por edhe transferimi i argjentinasit nga Interi shihet si një operacion tejet i vështirë për shkak të kostos së lartë.

Në këtë situatë, në radarin e Barcelonës ka dalë edhe Nicolò Tresoldi i Club Brugge. Sulmuesi gjerman, me një vlerë të përllogaritur rreth 25 milionë euro, po konsiderohet si një alternativë më e përballueshme.

Lista e Barcelonës përfshin edhe Vangelis Pavlidis të Benficas, Georges Mikautadze të Villarrealit, Luis Suárez të Sporting CP, Mikel Oyarzabal të Real Sociedadit dhe Junior Kroupi të Bournemouthit.

Ndërkohë, Viktor Gyökeres i Arsenalit mbetet gjithashtu në listë, por aktualisht shihet si një opsion dytësor.

Barcelona tashmë duhet të marrë një vendim për strategjinë e saj në sulm, me Julián Álvarez që mbetet objektivi kryesor, por me disa alternativa të gatshme në rast se marrëveshja dështon.