Tucheli është në rrezik për t’u dënuar nga FIFA
Thomas Tuchel mund të jetë një nga disa trajnerë dhe futbollistë që do të përballen me sanksione nga FIFA menjëherë pas përfundimit të Kupës së Botës.
Trajneri i Anglisë aktualisht po përgatit skuadrën për gjysmëfinalen historike ndaj kampiones në fuqi, Argjentinës, e cila do të zhvillohet në “Atlanta Stadium”, i njohur më parë si “Mercedes-Benz Stadium”.
Gjermani, i cili ka kontratë me Anglinë deri pas Euro 2028, ka arritur tashmë një sukses që vetëm tre trajnerë të tjerë të “Tre Luanëve” e kanë realizuar më parë – Sir Alf Ramsey, Sir Bobby Robson dhe Sir Gareth Southgate – duke e çuar kombëtaren angleze në gjysmëfinalen e Kupës së Botës.
Megjithatë, ndërsa synon të fitojë trofeun dhe të hyjë në histori si trajneri që i riktheu Anglisë titullin botëror, Tuchel mund të përballet me një problem tjetër pas përfundimit të turneut.
Sipas raportimit të “The Athletic”, FIFA do të presë fundin e Kupës së Botës për të shqiptuar sanksione ndaj lojtarëve dhe trajnerëve që konsiderohet se kanë dëmtuar imazhin e futbollit.
Vendimet do të bazohen në raportet e arbitrave, si edhe në faktorë të tjerë.
Një nga arsyet që mund të sjellë ndëshkime është kritika publike ndaj arbitrave, çka mund ta vendosë Tuchelin në shënjestër për komentet e tij pas ndeshjes së 1/8 së finales ndaj Meksikës.
Trajneri anglez kritikoi ashpër arbitrin australian Alireza Faghani pas përjashtimit me karton të kuq të Jarell Quansah.
“Nuk është mjaftueshëm mirë. Ai (arbitri) mund të nxjerrë jashtë çdo skuadër në çdo moment. Kjo nuk është e pranueshme. Vendimet janë të paqëndrueshme dhe të pabesueshme gjatë ndeshjeve.
“Tani kemi edhe arbitrat e katërt që të bërtasin sapo nxjerr një këmbë jashtë zonës teknike. Kjo nuk është e pranueshme”, deklaroi Tuchel pas ndeshjes.
Pas kartonit të kuq, Quansah u pezullua për dy ndeshje, duke humbur çerekfinalen ndaj Norvegjisë dhe gjysmëfinalen kundër Argjentinës.
Nëse FIFA arrin në përfundimin se komentet e Tuchelit kanë dëmtuar reputacionin e lojës, ai mund të ndëshkohet me gjobë ose pezullim nga stoli. Megjithatë, çdo vendim do të merret vetëm pas përfundimit të turneut.
Gjatë Botërorit janë shtuar edhe pretendimet se arbitrat kanë favorizuar Argjentinën.
Shefi i arbitrimit në FIFA, Pierluigi Collina, reagoi ndaj këtyre akuzave duke thënë:
“Kur zhvillohen kaq shumë ndeshje në një periudhë kaq të shkurtër, është normale që disa gjëra të mos shkojnë sipas planit.
“Kur ndodh kjo, arbitrat punojnë edhe më shumë për t’u përgatitur sa më mirë për ndeshjen e radhës.
“Diskutimet konstruktive për vendimet e arbitrave do të jenë gjithmonë pjesë e futbollit, por akuzat e pabazuara nuk kanë vend në sportin tonë.”
Collina shtoi gjithashtu: “Askush nuk mund të vërë në dyshim integritetin e arbitrave të Kupës së Botës. Po ashtu, askush nuk mund të pretendojë se arbitrimi i FIFA-s mund të ndikohet nga dikush, madje as nga presidenti i FIFA-s, Gianni Infantino. Arbitrat marrin vendime me ndershmëri dhe, ashtu si lojtarët dhe trajnerët, gjithmonë përpiqen të japin më të mirën”.
