Shala: Dënimet e buta po nxisin rritjen e kriminalitetit në Kosovë

Aktivitetet kriminale në Kosovë po vazhdojnë si pasojë e dënimeve të buta, mbingarkesës së prokurorive dhe mungesës së organizimit të strukturave të sigurisë, ka vlerësuar eksperti i sigurisë Drizan Shala, derisa ka kërkuar krijimin e mekanizmave preventivë dhe të një “harte të krimit” për kontrollimin e rasteve kriminale.

Shala tha se aktivitetet kriminale po vazhdojnë si pasojë e mosfunksionimit të mekanizmave institucionalë për garantimin e sigurisë.

“Padyshim që tanimë në aspektin retrospektiv statistikor në qoftë se i referohemi, kemi aktivitet të grabitjeve dhe vjedhjeve të ndryshme. Kjo për faktin se kemi disbalancë në mes mekanizmave përkatës të cilët do të duhej që të vepronin në mënyrë permanente, në mënyrë konstante dhe rigoroz sa i përket mbarëvajtjes dhe rikthimit të sigurisë të qytetarëve të Republikës së Kosovës”, tha ai.

Ai tha se dënimet e buta dhe mbingarkesa e prokurorive po ndikojnë që rastet kriminale të mos trajtohen në mënyrën e duhur.

“Pra, gjykatat me dënime relativisht të buta, prokuroria me një mbingarkesë me lëndë të ndryshme duke mos përmbushur atë figurën kriminale e cila më pas do të kishte me dhënë rezultatin e duhur, dhe njëkohësisht mos-organizimi i duhur i strukturave të sigurisë, pra Policisë së Kosovës, sa i përket vendeve apo hapësirave ku potencialisht, në bazë të rishikimit analitik të të dhënave të krimit i cili është zhvilluar në rajonet përkatëse, nuk ka bërë ndonjë ristrukturim substancial për të arritur që të përcillet mesazhi i duhur që Policia e Kosovës është aty për të ofruar sigurinë për të gjithë qytetarët e Republikës së Kosovës”, tha ai.

Shala tha se situata politike dhe mungesa e fokusit në zhvillimin ekonomik po ndikojnë gjithashtu në shtimin e rrezikut nga krimi i organizuar.

“Por një nga elementet tjetër i rëndësishëm që e bën këtë, që kemi një rritje kaq të madhe të aktivitetit kriminal në Republikën e Kosovës, është çështja e devalvimeve politike të cilat më pas e humbin përqendrimin e aspektit të investimeve në sektorin ekonomik dhe ky si rezultat e rrit potencialin e aktivitetit kriminal, por njëkohësisht e rrit mundësinë, po e ritheksoj, mundësinë e veprimeve të krimit të organizuar në Republikën e Kosovës”, tha ai.

Ai theksoi nevojën për krijimin e një sistemi të paralajmërimit të hershëm dhe të një harte të krimit për të parandaluar aktivitetet kriminale.

“Ne do të duhej që ta kemi një hartë të krimit, pra edhe përmes sistemit early warning (paralajmërim i hershëm), të arrihet minimizimi dhe kontrolli i aktiviteteve përkatëse kriminale duke krijuar mekanizmat preventivë. Përndryshe, trendi i aktivitetit të rritjes së aktivitetit kriminal do të jetë në rritje gjatë kësaj periudhe që po bisedojmë”, tha ai.

Sipas të dhënave të Policisë së Kosovës, gjatë periudhës janar-prill 2026 janë regjistruar 1 mijë e 64 raste të vjedhjeve dhe 724 raste të vjedhjeve të rënda.

Ndërsa në periudhën e njëjtë të vitit 2025 janë regjistruar 1 mijë e 194 raste të vjedhjeve dhe 744 raste të vjedhjeve të rënda, çka tregon se këtë vit ka pasur ulje të rasteve krahasuar me vitin paraprak./EO