Jashari dyshon se është manipuluar procesi zgjedhor në Skenderaj

Kandidati i pavarur për kryetar të Skenderajt, Bekim Jashari ka reaguar pas rezultateve të para që e nxjerrin të dytin në këtë komunë pas kandidatit të PDK-së Fadil Nura.

Jashari në reagimin e tij ka shkruar se sondazhet nga Exit pollet dhe rezultatet nga KQZ-ja nuk përputhen, duke hedhur dyshime për manipulim të votave në këtë komunë, transmeton Zeri.info.

Ai ka hedhur dyshime pasi siç ka thënë nga vëzhguesit e tyre në vendvotime deri me tani janë raportuar për raste të fletëvotimeve të pa vulosura në rreth 11 Qendra të Votimit, situatë kjo e cila sipas tij, dëshmon për ekzistencën e blerjes se votës me sistemin e njohur si "treni bullgar".

Reagimi i plotë i Jasharit:

Të nderuar qytetarë, Mbështetja juaj në çdo takim, sondazhet e Exit Polleve në njërën anë dhe rezultati zgjedhor sipas KQZ-së, është me mospërputhje të mëdha.

Gjatë ditës kemi raportuar për parregullsi të mëdha si blerje votash, shantazhe e presion tek votuesit.

Nga vëzhguesit tonë në vendvotime deri me tani janë raportuar për raste të fletëvotimeve të pa vulosura në rreth 11 Qendra të Votimit, situatë kjo e cila dëshmon për ekzistencën e blerjes se votës me sistemin e njohur si "treni bullgar".

Po ashtu mungesa e komisionerëve nga subjekti jonë politik ka dëmtuar jashtëzakonisht shumë votën tonë.

Idealit dhe Drenicës duket se me manipulime, blerje votash iu vjedh fitorja dhe e ardhmja nga ata që janë pasuruar duke vjedhur Kosovën.

Pas mbledhjes së fakteve të shumta për manipulime do të kërkojmë drejtësi për manipulimet e bëra në këto zgjedhje në Skenderaj.

Ne do të presim numrin e votës se fundit për të dalur me njoftimin e ri.

I juaji çdo herë Bekim Jashari!