Infektuar: 101517
Shëruar: 87012
Vdekur: 2072
Përmbyllet procesi i vlerësimit të votave nga diaspora, refuzohen mbi 20 mijë zarfe

Përmbyllet procesi i vlerësimit të votave nga diaspora, refuzohen mbi 20 mijë zarfe

Zgjedhjet 2021 February 27, 2021 - 15:18

Mbi 20 mijë zarfe me vota të supozuara nga diaspora janë refuzuar gjatë procesit të vlerësimit të tyre.

Kështu ka bërë të ditur sot, zëdhënësi i KQZ-së, Valmir Elezi, i cili ka njoftuar se mbrëmë pas mesnate është përmbyllur procesin e vlerësimit të rreth 43 mijë e 500 pakove të supozuara me fletëvotime, të cilat kanë ardhur gjatë periudhës së votimit përmes postës nga 2 deri më 12 shkurt, transmeton Zeri.info.

“Sipas të dhënave preliminare, janë aprovuar rreth 53 mijë e 600 zarfe me fletëvotime, ndërsa janë refuzuar rreth 20 mijë e 400 zarfe. Këto janë vetëm të dhëna preliminare, sepse shërbimi votues është duke rishikuar bazën e të dhënave nga ku do të kemi të shifra e sakta dhe përfundimtare të numrit të fletëvotime nga jashtë vendit të cilat do të numërohen këtu në QNR”, ka thënë Elezi.

Po ashtu është bërë e ditur se deri më tani janë rinumëruar rreth 88% apo 487 vendvotime nga 552 sa është numri i përgjithshëm i tyre dhe po punohet që ky proces të përfundoi gjatë ditës së sotme.

Elezi ka bërë të ditur gjithashtu se nesër pritet të nis numërimi i votave me kusht dhe të personave me nevoja të veçanta dhe pas tyre numërimi i votave me postë.

“Po punojmë shumë që nesër gjatë ditës të mund të fillojmë me numërimin e rreth 31 mijë e 500 votave me kusht dhe dhe rreth 2 mijë e 800 votave të personave me nevoja të veçanta. Pastaj, edhe numërimin e votave të cilat kanë ardhur përmes postës”, ka bërë të ditur Elezi./Zëri