Frashëri i PSD-së vazhdon të mbajë inate me Kurtin, e quan “një mashtrim i ri nga një lider suprem”

Anëtari i PSD-së, Frashër Krasniqi, vazhdon të shfaqë inatet e tij me liderin e partisë fituese të zgjedhjeve të 14 shkurtit, Albin Kurti.

Madje e quan atë një mashtrim i ri nga një lider suprem.

“Do të kisha dashur t’ia uroj Kosovës zgjedhjet e 14 shkurtit. Si të tjerët. Por s’mundem. Sepse s’mund t’ia uroj askujt fitoren e popullizmit. As atyre që fituan. S’mund t’ia uroj Kosovës dhe askujt fitoren e mendësisë autoritare. Do të doja të uroja, por fitorja s’ka vlerë në vetvete. Fitore e kujt dhe për çka? Për një shtet ku pabarazia e moszhvillimi ekonomik do të vazhdojnë? Jo faleminderit. Për një shtet ku liria e demokracia do të rrezikohen? Kjo nuk është fitore. Jo e Kosovës dhe qytetarëve të saj. Është fitore e një mashtrim të ri, me liderin suprem në krye”, thotë Frashëri përmes një postimi në “Facebook”, raporton “Zeri.info”.

Sipas tij, LVV-ja ka korrur projekte politike famëkeqe në të kaluarën.

“Mos harroni që fitore të thella, edhe më bindëse se kjo, kanë arritur shpesh të korrin projektet politike fort famëkeqe në të kaluarën. Veçanërisht ato. Por historia sot i ngre në piedestal jo ata që uruan. Që u tërhoqën para triumfit të forcës e të numrave. Historia u dha të drejtë atyre që s’u nënshtruan e s’u zbythën. Atyre që qëndruan ulur, kur të gjithë iu ngritën në këmbë liderit. Atyre pak njerëzve që u ngritën në këmbë, atëherë kur shumica ishte e përulur”, shkruan anëtari i PSD-së.

“Nuk do të bëhem pjesë e korit vetëm pse ai po këndon, sepse kënga që po e këndon është e zymtë dhe mbytëse. Është këngë union, pa larmi e dallime. E do të ishte edhe më ogurzezë po t’mos kishte disonancë. Prandaj do të disonojë. Kundër hegjemonisë së diskursit të ri. Bashkë me të gjithë ata që nuk iu nënshtruan këtij urimi hipokrit. Për një melodi të re, të larmishme, të hapur e progresive”. /Zëri