LDK-ja, thirrje qytetarëve që të votojnë pa asnjë ndikim

Lidhja Demokratike e Kosovës (LDK) ka njoftuar se deri më tani procesi zgjedhor është zhvilluar pa ndonjë parregullsi.

“LDK-ja po e përcjell me kujdes procesin zgjedhor dhe se deri më tani nuk ka asnjë shqetësim serioz”, ka thënë Ardita Dushi, nga Shtabi Zgjedhor i LDK-së, gjatë një konference për media, raporton “Zeri.info”.

Dushi ka falënderuar institucionet e Kosovës, të cilat po angazhohen për të krijuar kushte të favorshme që qytetarët të arrijnë të votojnë.

“Dalja e votuesve përkundër kushteve të vështira atmosferike po vazhdon të jetë në përputhje me trendin e zakonshëm. Falënderojmë të gjitha institucionet e Kosovës, të cilat me përkushtim po angazhohen për të krijuar kushte të favorshme që qytetarët të arrijnë në qendrat e votimit”, tha ajo.

Po ashtu LDK-ja u bën thirrje qytetarëve të shfrytëzojnë të drejtën e tyre për të votuar pa asnjë ndikim.

“Brenda qendrave të votimit të bëhet rend për rregull, sipas udhëzimeve të KQZ-së. LDK-ja u bën thirrje qytetarëve ta ushtrojnë të drejtën e tyre për të votuar pa asnjë ndikim”, ka përfunduar Dushi. /Zëri