Hoti: Vetëm me qeverisjen tonë Kosova ka normalitet, stabilitet dhe zhvillim
Kandidati i LDK-së për kryeministër, Avdullah Hoti, në përmbyllje të fushatës zgjedhore ka thënë se vetëm me qeverisjen e Lidhjes Demokratike vazhdojnë reformat në ekonomi që sjellin zhvillim, punësim dhe mirëqenie.
“Vetëm në programin qeverisës të Lidhjes Demokratike parashihet, me veprime konkrete, politikat që çojnë në rritjen e pensioneve dhe ndihmave sociale. Ne jemi zotuar të heqim kufizimin prej 15 vitesh për pensionet kontribut-dhënëse. Ne jemi zotuar se nuk do të ketë ndihmë sociale apo pension nën 300 euro. Ne do të institucionalizojmë kujdesin për personat me nevoja të veçanta. Qeveria e re do të financojë 15% të projekteve të organizatave joqeveritare”, tha Hoti.
Ai i ka porositur qytetarët “mos u mashtroni nga premtimet boshe të kundërshtarëve tanë, atyre që kundërshtonin çdo gjë, atyre që kundërshtuan çdo hap në rrugën e gjatë të shtet-ndërtimit”.
“Ato premtime nuk bazohen në asnjë program. Ju e keni vërtetuar vetë se vetëm ne kemi prezantuar program të plotë qeverisës në këto zgjedhje. Ju ftoj të krahasoni qeverisjen tonë me qeverisjet e kaluara. Ata merreshin me teori konspirative për harta e thika në Shtëpinë e Bardhë. Ne komunikonim drejtpërdrejt me miqtë tanë perëndimore”, u shpreh ai.
Hoti ka shtuar se oponentët politik nuk lanë gjë pa thënë për Administratën amerikane.
“Ne morëm ftesë për të nënshkruar marrëveshje në Shtëpinë e Bardhë, që është kontratë me partnerin tonë strategjik, me aleatin tonë më të fuqishëm. Me veprimet e tyre, u vendosën sanksione financiare ndaj Kosovës.Ne nënshkruam marrëveshje për projekte madhore. Ata merrnin kërcënime për tërheqje të trupave amerikane nga Kosova. Ne u ftuam të bëhemi bashkë me ushtrinë tonë në misione paqeruajtëse”, thënë kandidati për kryeministër.
Sipas Hotit, me qeverisjen e LDK-së, Kosova u kthye në krye të agjendës amerikane për Ballkanin.
“Letra e Presidentit Biden, e rikonfirmoi mbështetjen e palëkundur të Shteteve të Bashkuara të Amerikës për Republikën e Kosovës, si shtet sovran. Kjo nuk është arrihet me retorikë boshe dhe letra të mbushur me parulla ndaj miqve tanë perëndimor, siç bënin këta. Kjo arrihet me veprime vizionare, me veprime konkrete shtet formuese. Kjo letër hodhi poshtë teoritë, që ishin dhe mbeten teori të marra, se në Shtëpinë e Bardhë po planifikohej copëtimi i Kosovës”, ka përfunduar Hoti./Zëri
