Donald Tusk: Hoti, kandidati më i mirë për kryeministër të Kosovës
Presidenti i Partive Popullore Evropiane (EPP), Donald Tusk, i ka dhënë mbështetje të fuqishme për zgjedhjet e 14 shkurtit kandidatit të LDK-së për kryeministër, Avdullah Hoti.
“LDK-ja ka eksperiencën e duhur për t’u përballur me sfidat e Kosovës. Për këtë arsye ne i japim mbështetje të plotë kryeministrit Avdullah Hoti dhe ekipit të tij në LDK në zgjedhjet e 14 shkurtit. I besoj eksperiencës së kryeministrit, posaçërisht në ndërmarrjen e reformave ekonomike, ai po ashtu e di më së miri si të avancojë me shumë Kosovën drejt rrugës evropiane, pa retorikë popullste. Jam i sigurt se LDK-ja do të bëjë më të mirën për ta drejtuar vendin në menaxhimin e pandemisë dhe krizës shëndetësore dhe do të bëjmë më të mirën për të përmirësuar ekonominë e goditur nga pandemia. Kur e shoh listën garuese të LDK-së me kaq eksperiencë, nuk kam pikë dyshimi se ju do t’ia dilni, fillimisht duke i fituar zgjedhjet të cilat duhet të jenë fer dhe të lira”, ka thënë Tusk në një adresim për qytetarët e Kosovës.
Sipas tij, kandidatura e Avdullah Hotit për kryeministër është më e mira për Kosovën.
“Në këto kohë të turbullta vetëm një ekip i tillë me eksperiencë do të ketë sukses për ta zhvilluar Kosovën, duke i ofruar asaj zhvillim e prosperitet, duke siguruar drejtësi të pavarur, media të lira dhe luftë kundër korrupsionit, duke forcuar sundimin e rendit dhe ligjit, ndarjen e pushteteve dhe qeverisjen në mënyrë transparente. Ju bëjë thirrje që të jeni të bashkuar dhe të fortë rreth kandidaturës së Avdullah Hotit, e cila është më e mirë për Kosovën. Duhet t’i ofroni atij dhe ekipit të tij një mandat të qartë të dielën e 14 shkurtit”, tha presidenti i Partive Popullore Evropiane (EPP), ku LDK-ja është anëtare.
Tusk e ka përmbyllur mesazhin e tij, duke kujtuar vizionin e presidentit historik dr. Ibrahim Rugova për Kosovën.
“ Me lejoni ta mbylli duke iu referuar vizionit të Rugovës, që ishte avokat i madh për qëllimin e tij, për një Kosovë demokratike, me shoqëri politike tolerante dhe me ekonomi të zhvilluar, të integruar në Bashkimin Evropian. Avdullah Hoti e ka dëshmuar se vepron në këtë frymë. Ai ka dëshmuar se mund të hapë dyert për një të ardhme të suksesshme për Kosovën. Ne do të vazhdojmë të jemi partner i tij dhe LDK-ja mund të llogarisë në mbështetjen time dhe të familjes politike të Partive Popullore Evropiane, Shteti, shtet”, ka thënë Tusk ne mesazhin e tij.
