Kurti për Bidenin: Besoj që nuk do i ngjajë presidentit të vjetër i cili mendoi se politika dhe biznesi janë të njëjta

Kryetari i LVV-së, Albin Kurti ka thënë sot se Kosova duhet t'i forcojë mardhëniet me SHBA-në, të cilin e ka quajtur si aleati strategjik dhe kryesor i vendit tonë.

Në një bashkëbisedim me qytetarët, Kurti tha se SHBA-ja është partneri ynë historik dhe se është i domosdoshëm bashkëpunimi më i madh në fushën e ekonomisë dhe politikës.

"Biden është një mundësi historike për neve pasi ai e njeh Ballkanin. Ka qenë i përfshirë vetë në marrëdhënie politike,. Ai ka qenë në Kosovë disa herë dhe një rrugë mbanë emrin e djalit të tij”, tha Kurti.

Mes tjerash, Kurti tha se beson që Bideni nuk do i ngjajë ish-presidentit Trump, pasi sipas tij, mendonte se politika dhe biznesi janë të njejta.

“Besoj që nuk do i ngjan këtij presidentit të vjetër i cili mendoi se politika dhe biznesi janë të njëjta. E kuptojmë se politika është financa, por sa është ekonomi është edhe histori. E kur historia harrohet ajo përsëritet. Në rastin e Serbisë kemi krimet që i kanë kryer gjatë luftës e që janë histori. Ajo nuk ka kërkuar falje për krimet e luftës, krimet ndaj njerëzit dhe gjenocid. Duhet të kërkojmë përgjegjësi atje. Nuk po arrijmë të kalojmë këtë edhe 20 vjet pas çlirimit dhe 13 vjet pas pavarësisë”, tha ai.

Kurti ka komentuar edhe letrën që presidenti Biden i ka dërguar presidentit të Serbisë, Aleksandar Vuçiq, ku mes tjerash i kërkoi edhe njohjen e Kosovës, e që sipas Kurtit kjo letër tregoi esenvën ku presidenti i SHBA-së i bënë të qartë atij të Serbisë se njohja e Kosovës duhet të ndodhë.

“Mendoi si ishte një letër e cila tregoi esencën ku presidenti i SHBA’së i bënë të qartë atij të Serbisë se njohja e Kosovës duhet të ndodhë. Kjo duhet te ndodh gjithsesi dhe eshte e pakuptueshme pse nuk ka ndodhur. Unë besoj që kjo nuk ka më nevojë të diskutohet. Statusi i Kosovës dihet, ajo është e pavarur", shtoi Kurti./Zëri