Hoti: Të gjithë ishin kundër Marrëveshjes së Washingtonit, sot po i heshtin rezultatet e saj

Kandidati për kryeministër i Lidhjes Demokratike të Kosovës (LDK) Avdullah Hoti, sot në Shtime tha se të gjitha partitë politike në Kosovë, në pushtet dhe opozitë, ishin kundër Marrëveshjes së Washingtonit, ndërsa tani po heshtin kur po i shohin rezultatet e saj,

Investim këto sipas tij, 1 miliard investime që kanë filluar të alokohen në Kosovë, njohjen nga Izraeli, përfshirjen e ushtrisë sonë në misione paqeruajtëse.

“U bënë bashkë të gjithë kundër Lidhjes Demokratike të Kosovës për të kundërshtuar dhe minuar Marrëveshjen e Washingtonit, të cilën e nënshkrova me presidentin Trump. Disa kishin paranoja për thika dhe harta, për gjoja copëtimin e Kosovës, disa kundërshtonin sepse dëshironin të ishin protagonistë, ndërsa disa të tjerë synon të sabotonin shtëpinë vet për konsum të brendshëm. Unë dhe partia ime qëndruam fuqishëm, pasi që në Shtëpinë e Bardhë është sublimuar pavarësia dhe sovraniteti i Kosovës dhe asnjë e keqe nuk vjen nga partnerët tanë historik dhe strategjik”, tha kandidati për kryeministër.

Hoti e ka falënderuar administratën Biden që në fillim të këtij muaji ka filluar zbatimin e pikës së Marrëveshjes së Uashingtonit për investime amerikane nëpërmes Korporatës Sfidat e Mijëvjeçarit (MCC).

“Të nderuar qytetarë, kanë kaluar disa muaj nga kjo marrëveshje historike e Kosovës dhe asnjë e keqe nuk na erdhi. Të mirat e kësaj marrëveshje do ta forcojnë shtetin e Kosovës, do të përmirësojnë jetën e qytetarëve dhe do të na ndihmojnë të integrohemi në NATO, BE dhe OKB”, shtoi Hoti.

Duke bashkëbiseduar me banorët e Shtimes, Hoti premtoi vazhdimin e përkrahjes për sektorin e bujqësisë, për të cilin tha se vetëm gjatë këtij viti, janë dyfishuar subvencionet për bujqit. /Zëri