Hoti në Klinë: Qeveria 7-mujore e LDK-së, rezultate historike për Kosovën

Kandidati për kryeministër nga radhët e Lidhjes Demokratike të Kosovës, Avdullah Hoti, sot gjatë një tubimi elektoral në Klinë theksoi se fitorja e LDK-së më 14 shkurt është fitore e Kosovës dhe e zhvillimit të saj.

“Grupacioni tjetër me të cilin konfrontohemi për mbrojtjen e shtetit të Kosovës në vitet e ’90 bënte thirrje që të marrim pjesë në zgjedhjet e Serbisë. Kjo është e vërtetë! E kanë kundërshtuar Marrëveshjen e Rambujesë, e kanë kundërshtuar Planin e Ahtisaarit, janë vrarë njerëzit në rrugë në vitin 2007 duke e kundërshtuar këtë plan. Vetëm shihni listën e tyre, të mbushura me ekstremistë të të gjitha formave, duke përfshirë edhe adhuruar të Enver Hoxhës”, tha Hoti.

Ai shtoi se qeverisja shtatëmujore e LDK-së ka arritur rezultate historike për Kosovën.

“Kemi dalë me rezultatet më të mira dhe e kemi nxjerrë Kosovën nga izolimi. Me Marrëveshjen e Washingtonit siguruam njohjen nga Izraeli dhe një miliard euro investime, kemi menaxhuar mirë me pandeminë, do ta rimëkëmbim ekonominë dhe do të ndihmojmë bizneset. Ne kemi gjeneruar 700 milionë euro që janë investuar në ekonomi dhe tash që po flasim e kemi kaluar krizën ekonomike. Pra ne dimë të menaxhojmë edhe me shtetin, edhe me ekonominë”, tha kandidati i LDK-së për kryeministër.

Ai u shpreh i bindur se vota për numrin 132 më 14 shkurt është votë për projektin e shtetit të Kosovës.

“LDK-ja është e palëkundur dhe do ta çojë projektin e ndërtimit të shtetit dhe zhvillimit deri në fund. Ne do të fitojmë për të mirën e Kosovës dhe të ardhmen e saj. Për të mirën edhe të atyre që po na kundërshtojnë, sepse edhe ata përfitojnë nga zhvillimi ekonomik dhe integrimi euroatlantik”, tha Hoti.

“Për të siguruar shtet ligjor plotësisht funksional, do të nisim vetingun në drejtësi, që do të rrisim efikasitetin dhe transparencën në drejtësi. Në të gjitha këto procese do të përfshihet mërgata jonë, sepse vetëm kështu e konsolidojmë dhe forcojmë shtetin që e kemi nisur bashkë”, shtoi Hoti. /Zëri