Talljet e ironizimet me slloganet e partive në këto zgjedhje nuk kanë të ndalur
Lidhja Demokratike e Kosovës ka publikuar sot slloganin me të cilin do të kandidojë në zgjedhjet e 14 shkurtit.
“Shteti. Shtet” është sllogani i përzgjedhur nga kjo parti, ndërsa që nga momenti i publikimit është përcjellur me ironi nga përkrahësit e partive të tjera politike në vend, raporton Zeri.info.
Këtyre talljeve u është bashkuar edhe ish-deputetja e Kuvendit të Kosovës, Duda Balje.
Ajo përmes një postimi në “Facebook” ka ironizuar me këtë sllogan.
“Duda. Dudë”, ka shkruar Balje.
Edhe qytetarë tjerë e treguan kreativitetin e tyre duke u tallur me slloganin e LDK-së. "Qebap. Qebapi", "Facebook. Facebooku", "Hashim. Presidenti", e të ngjashme.
Shaka, ironizime e sulme pati edhe me slloganin e LVV-së, "Krejt dhe Drejt". Ajo u akuzua, kryesisht nga kundërshtarët politikë, se po e synon kapjen e shtetit.
Po ashtu, edhe sllogani i PDK-së nuk kaloi i pavërejtshëm.
"Rimëkëmbja" nga qytetarët u komentua në formën se kjo parti deri më tani i paska nëpërkëmbur qytetarët.
Kurse "Guximi" i Osmanit është komentuar pak, pasi e njëjta nuk arriti të regjistronte as nismë e as listë të veten në KQZ, duke vendosur qe t'i bashkohet listës së LVV-së.
Sllogani i saj u sulmua kryesisht nga ish-bashkëpartiakët e saj nga LDK-ja, të cilët nuk e cilësuan "të guximshëm" veprimin e saj, por edhe nga PDK-ja, e cila e akuzoi se ua ka vjedhur slloganin e tyre te viteve të hershme të 2000-ës.
E ai i AAK-së, "Forca e Kosovës", duket se nuk u bëri përshtypje "kreativëve". /Zëri
