Egnatia shpallet kampione e Shqipërisë
Egnatia ka konfirmuar dominimin e saj në futbollin shqiptar, duke u shpallur kampione e Shqipërisë për të tretin sezon radhazi.
Skuadra nga Rrogozhina siguroi titullin pas fitores 2:0 ndaj Dinamos në ndeshjen vendimtare, e zhvilluar në stadiumin “Elbasan Arena”.
Në një sfidë ku Egnatia tregoi qartësisht ambiciet për trofeun, protagonisti kryesor ishte Alessandro Albanese, i cili realizoi dy gola brenda një intervali prej vetëm dhjetë minutash, duke vulosur fatin e takimit dhe të kampionatit.
Në anën tjetër, Dinamo nuk arriti të reagojë ndaj epërsisë së kundërshtarit, megjithatë, skuadra kryeqytetase e kishte siguruar më herët një trofe këtë edicion, pasi kishte fituar Kupën e Shqipërisë dhe në këtë duel nuk kishte më objektivin kryesor të sezonit.
Ndërkohë, në stadiumin “Air Albania” u zhvillua përballja tjetër ku Elbasani triumfoi ndaj Vllaznisë me rezultat 2:1.
Pavarësisht tri pikëve të fituara, verdheblutë nuk arritën ta rrëmbenin titullin, pasi suksesi i Egnatias bëri që rrogozhinasit të ruanin epërsinë në renditje.
Pas përfundimit të garës, Egnatia dhe Elbasani e mbyllën fazën “Final 4” me nga 37 pikë secila, por kampionët përfituan falë bilancit më të mirë në ndeshjet direkte, kriter që rezultoi vendimtar në përcaktimin e fituesit të titullit.
Vllaznia e përfundoi sezonin në pozitën e tretë, ndërsa Dinamo u rendit në vendin e katërt. Megjithatë, skuadra blu e mbylli edicionin me një trofe të rëndësishëm, atë të Kupës së Shqipërisë, të fituar vetëm pak javë më parë.
Me këtë sukses, Egnatia vazhdon të shkruajë historinë e saj në futbollin shqiptar, duke u konfirmuar si një nga skuadrat më të forta dhe më të qëndrueshme të viteve të fundit.
