Gresa Bakraçi thyen rekordin shtetëror në garën ndërkombëtare 10 km të mbajtur në Shkup

Atletja e Kosovës, Gresa Bakraçi, ka thyer rekordin shtetëror në garën 10 kilometra të mbajtur në Shkup, ku morën pjesë 428 atletë nga vende të ndryshme të botës.

Ajo arriti të përmirësojë rekordin e deritanishëm prej 35:32, duke e përfunduar garën për 14 sekonda më shpejt dhe duke u renditur në vendin e parë. Në këtë garë, Bakraçi la pas edhe kampionen ballkanike nga Serbia, e cila u rendit në vendin e dytë.

Ministri i Sportit dhe Rinisë, Blerim Gashani, e ka vlerësuar lart këtë sukses, duke theksuar rëndësinë e arritjes së saj për sportin kosovar.

“Ky sukses është dëshmi e talentit, disiplinës dhe punës së palodhshme që sportistët tanë po e tregojnë çdo ditë në arenën ndërkombëtare”, ka deklaruar ministri Gashani.

Ai shtoi se: “Në emër të Ministrisë së Sportit dhe Rinisë, e urojmë Gresën për këtë arritje të madhe dhe për mënyrën dinjitoze me të cilën po e përfaqëson Kosovën”.

Ky rezultat konsiderohet një tjetër moment krenarie për sportin kosovar dhe një motivim për gjeneratat e reja.