Shefi i OKB përgëzon Navi Pillay për Çmimin Nobel për Paqe 2026
Sekretari i përgjithshëm i OKB-së, Antonio Guterres ka përgëzuar Navanethem “Navi” Pillay për fitimin e Çmimit Nobel për Paqe 2026, duke vlerësuar angazhimin e saj shumëdekadësh për mbrojtjen e së drejtës ndërkombëtare, të drejtave të njeriut dhe drejtësisë.
Guterres në një deklaratë e përshkroi Pillay si një “kampione” të së drejtës ndërkombëtare dhe të të drejtave të njeriut si dhe si një zë të pavarur në mbrojtje të drejtësisë në disa prej çështjeve më të rëndësishme juridike ndërkombëtare të kohëve të fundit.
Ai theksoi punën e saj në Afrikën e Jugut, si dhe angazhimin e saj si gjyqtare ndërkombëtare dhe presidente e Tribunalit Ndërkombëtar Penal për Ruandën.
Guterres vlerësoi gjithashtu punën e Pillay në çështjet që lidhen me krimet ndërkombëtare, përfshirë gjenocidin në Ruandë. Ai përmendi edhe periudhën kur ajo shërbeu si komisare e lartë e OKB-së për të Drejtat e Njeriut si dhe rolin e saj drejtues në Komisionin e Pavarur Ndërkombëtar Hetimor të OKB-së për Territorin e Pushtuar Palestinez.
Përmes këtyre roleve, tha Guterres, Pillay ka dëshmuar se “forca e ligjit duhet të mbizotërojë mbi ligjin e forcës” dhe se mbrojtja e të drejtave të njeriut është garancia më e sigurt kundër padrejtësisë.
“Në arsyetimin e tij për ndarjen e çmimit, Komiteti Nobel i kujtoi botës se paqja duhet të ndërtohet mbi parime të qëndrueshme, e jo mbi vullnetin e të fuqishmëve. Çmimi i sotëm është një homazh për të gjithë ata që punojnë për të mbështetur dhe mbrojtur të drejtën ndërkombëtare, sundimin e ligjit dhe të drejtat e njeriut si dhe për të garantuar paqen, drejtësinë dhe dinjitetin njerëzor”, tha Guterres.
