SHBA-ja kryen sulme ndaj Iranit pas sulmit ndaj një anijeje mallrash
Ushtria amerikane ka kryer sulme ndaj objektivave iraniane, pasi presidenti Donald Trump e akuzoi Iranin për një "shkelje të pamatur" të armëpushimit, pas një sulmi ndaj një anijeje mallrash në Ngushticën e Hormuzit.
Nuk u raportuan viktima pasi anija u godit të enjten nga një dron vetëshkatërrues, një incident që nxiti planet për evakuimin e më shumë se 11 mijë marinarëve, të cilët kishin mbetur të bllokuar në rajon.
Si përgjigje, Komanda Qendrore e SHBA-së (CENTCOM) njoftoi të premten se kishte goditur depo raketash dhe dronësh, si dhe pozicione radarike bregdetare në Iran.
Pak çaste para se të njoftoheshin sulmet, presidenti Trump, i pyetur nëse SHBA-ja do t'i përgjigjej sulmit iranian, u përgjigj. "Do ta shihni.
" Në një deklaratë, CENTCOM i përshkroi sulmet si "një përgjigje të fuqishme" ndaj sulmit me dron. "Agresioni i pajustifikuar i forcave iraniane ndaj transportit tregtar detar përbën një shkelje të qartë të armëpushimit", thuhet në deklaratë.
"Më tej, sjellja e rrezikshme e Iranit minoi lirinë e lundrimit në një kohë kur tregtia po kalon gjithnjë e më shumë përmes këtij korridori jetik ndërkombëtar." CENTCOM shtoi se ushtria amerikane do të "vazhdojë të koordinojë dhe mbështesë kalimin e sigurt të anijeve tregtare që lundrojnë nëpër Ngushticën e Hormuzit".
Pas nisjes së sulmeve amerikane dhe izraelite ndaj Iranit në fund të muajit shkurt, Teherani e mbylli në mënyrë efektive Ngushticën e Hormuzit – një rrugë ujore kyçe për transportin e naftës dhe gazit – duke shkaktuar rritje të çmimeve globale të naftës dhe duke penguar transportin e mallrave të tjera të rëndësishme, si plehrat kimike, raporton BBC.
SHBA-ja dhe Irani ranë dakord më 17 qershor për t'i dhënë fund armiqësive përmes një memorandumi mirëkuptimi me 14 pika, i cili parashihte gjithashtu që Irani të bënte "përpjekjet më të mira" për të garantuar kalimin e sigurt të anijeve tregtare pa tarifë për një periudhë 60-ditore.
