Cakolli: 31 maji dhe 7 qershori, datat e vetme kushtetuese për mbajtje të zgjedhjeve
Në mungesë të gjetjes së një zgjidhjeje për presidentin, partitë opozitare tanimë kanë filluar t’i bëjnë kalkulimet për zgjedhje të reja, për të cilat thonë se janë gati.
Por një proces i ri elektoral do të ketë jo pak sfida, vlerësojnë monitoruesit, sidomos për shkak të devijimit të votave për kandidatët në zgjedhjet e fundit, për çka disa komisionerë ende janë në paraburgim
Më shumë se asnjëherë në legjislaturën e 10-të, tani në horizont po shihen zgjedhjet e reja.
Në rast se nuk arrihet një konsensus për presidentin, për çka ka pak gjasa, datat e zgjedhjeve, tanimë dihen.
“Në rast se nuk do të ketë përfshirje të Kushtetueses me ndonjë lëndë, ekzistojnë dy data: 7 qershor dhe 31 maj, si datat e vetme kushtetuese”, ka deklaruar Eugen Cakolli, Instituti Demokratik i Kosovës.
Por, cilado që të jetë data, diçka dihet me siguri: disa nga komisionerët që numëruan vota në zgjedhjet e fundit, tani zgjedhjet e reja potenciale, ka mundësi t’i presin në paraburgim. Ky precedent, pritet që të ketë jo pak ndikim, në perceptimin publik.
“Me atë që ngjau në zgjedhjet e fundit, normalisht që do të reflektonte në kuptim të pjesëmarrjes, por edhe vëmendjes së procesit të numërimit, i cili në zgjedhjet e fundit, prodhoi qindra/mijëra vota preferenciale dallim”, ka deklaruar Eugen Cakolli, Instituti Demokratik i Kosovës.
Zgjedhjet eventuale, mund të evitohen veç nëse deri më 28 prill zgjidhet presidenti ose presidentja e Republikës së Kosovës. /Dukagjini
