Avokati serb mundohet t’i shfajësojë të akuzuarit për terrorizëm në Banjskë

Avokati Lubomir Pantoviq në seancën e shqyrtimit kryesor ka folur rreth rastit të ngjarjes në Banjskë, duke theksuar shqetësimet për mënyrën sesi po trajtohen të pandehurit në opinionin publik dhe në procesin gjyqësor.

Pantoviqi, i cili përfaqëson Blagoja Spasojeviqin, deklaroi se nga paslufta në Kosovë ka njohur shumë ngjarje të rënda, por rasti i Banjskës ka tërhequr vëmendjen më të madhe të shoqërisë dhe është shoqëruar me spekulime të shumta.

Ai theksoi se, para një vendimi përfundimtar të gjykatës, të pandehurit po trajtohen si fajtorë në publik, gjë që sipas tij është në kundërshtim me parimin themelor juridik të prezumimit të pafajësisë. “Çdo i pandehur duhet të gëzojë të drejtat që i takojnë sipas ligjit. Askush nuk mund të konsiderohet fajtor pa një vendim të prerë gjyqësor”, u shpreh Pantoviqi.

Ai gjithashtu kritikoi thirrjet për dënime maksimale, duke përfshirë burgimin e përjetshëm, duke theksuar se këto deklarata janë të parakohshme dhe mund të ndikojnë në drejtësinë e procesit.