Sela: Tryeza e përbashkët shqiptare në këtë moment, më se e nevojshme

Kryetari i Aleancës për Shqiptarët, Ziadin Sela, tha se në këtë moment është më se e nevojshme tryeza e përbashkët shqiptare.

“A ju kujtohet sa gjatë kam fol për tryezën e përbashkët të partive politike parlamentare shqiptare, për këto momente kjo tryezë është e nevojshme. Këto janë momentet me të cilët ndodhemi edhe si faktor politik, edhe fituesit, edhe humbësit, edhe Fronti Evropian, edhe Vlen të gjithë bashkë i japin më kuptim legjitimitetit të shqiptarëve”, deklaroi mes të tjerash Sela në TV21.

Ai gjithashtu tha se Fronti Evropian ka marrë votë të mbrojë votën e qytetarëve.

Sela mes të tjerash tha se dikush ka marrë vota në emër të satanizmit.

“Nuk është kërcënim publik të mbrojsh të drejtën e shenjtë të shqiptarëve për të votuar, për të vendos për ardhmërinë e tij, të familjes së tij. Kjo nuk është shantazh, është e drejtë legjitime e tij që ai të vendos me votë dhe është e drejtë legjitime që të dal të mbrojë votën në momentin që dikush tjetër ka marrë vota në emër të satanizmit, në emër të shkeljes të të drejtave dhe të vazhdojë të ia shkel edhe të drejtën elementare të shprehur me votë, është e drejtë që të dalësh dhe ta mbrojsh votën”, tha Ziadin Sela.

Ndryshe, pas rivotimit të djeshëm, Fronti Evropian do të ketë një mandat më pak në njësinë e gjashtë zgjedhore, ndërsa numri i përgjithshëm i deputetëve të tyre sipas KSHZ-së tani është 18, kurse koalicioni Vlen ka 14.