Real Madridi kërkon 80 milionë euro nga gjashtë klubet angleze për Superligën e dështuar

Real Madridi ka nisur të kërkojë nga gjashtë klubet angleze pjesën e tyre të shpenzimeve për krijimin e Superligës Evropiane, projektit që dështoi vetëm pak ditë pas prezantimit në prill të vitit 2021.

Klubi madrilen pretendon se Arsenali, Chelsea, Manchester City, Manchester United, Tottenhami dhe Liverpooli duhet të përmbushin detyrimet financiare që kishin marrë përsipër në momentin kur iu bashkuan projektit.

Sipas raportimit të The Athletic, shuma e përgjithshme që po kërkohet arrin në rreth 80 milionë euro. Gjashtë klubet angleze u tërhoqën vetëm disa ditë pas shpalljes së Superligës, për shkak të reagimeve të ashpra nga tifozët dhe institucionet e futbollit.

Real Madridi mbështetet në marrëveshjen fillestare

Sipas qëndrimit të klubit madrilen, tërheqja nga projekti nuk i përjashton klubet angleze nga përgjegjësitë financiare që kishin pranuar në fillim.

Të gjitha klubet themeluese kishin nënshkruar një marrëveshje për kompaninë që do ta menaxhonte Superligën.

Megjithatë, ekziston një mosmarrëveshje rreth interpretimit të kësaj marrëveshjeje dhe nëse ajo i detyron klubet të paguajnë për shpenzimet e projektit. Për këtë arsye, çështja mund të përfundojë në gjykatë.

Paratë nuk do të shkonin drejtpërdrejt në arkat e Real Madridit

Sipas Mundo Deportivo, nëse pagesa realizohet, paratë do të shkonin te kompania A22 Sports, promotore e Superligës, dhe jo drejtpërdrejt te Real Madridi.

Kërkesa vjen në një kohë kur klubi i drejtuar nga Florentino Pérez ka përmirësuar marrëdhëniet me UEFA-n, pas arritjes së një marrëveshjeje parimore në shkurt të vitit 2026.

Megjithatë, kjo nuk i ka dhënë fund mosmarrëveshjeve financiare që lidhen me projektin e dështuar.

Tani mbetet të shihet nëse gjashtë klubet angleze do të pranojnë të paguajnë pjesën e kërkuar apo nëse beteja për shpenzimet e Superligës do të zhvendoset në gjykatë. /Zëri