Ish-ylli i Francës e përkrahë Mbappen për Topin e Artë: Është më i miri në botë
Kylian Mbappe do të ketë vetëm një mundësi të vogël për ta fituar Topin e Artë në ceremoninë që do të mbahet në Londër më vonë gjatë këtij muaji, me Lamine Yamal që pritet të jetë në qendër të vëmendjes.
Sulmuesi i Real Madridit ka statistika që e mbështesin kandidaturën e tij, por vjen pas një sezoni pa trofe.
Mbappe nuk arriti të fitonte asgjë me Real Madridin sezonin e kaluar, ndërsa kombëtarja e Francës u mposht nga Spanja në gjysmëfinalen e Kupës së Botës, ndonëse vetë francezi e përfundoi garën si fitues i Këpucës së Artë.
Pavarësisht sezonit pa trofe, ish-mesfushori i Sevillas, Steven Nzonzi, beson se Mbappe i ka të gjitha meritat për ta fituar Topin e Artë.
Duke folur para ndeshjes së fundjavës mes Real Madridit dhe ish-klubit të tij, Sevilla, 38-vjeçari, i cili aktualisht luan te Dunkerque, nuk la vend për dyshime se kë e konsideron futbollistin më të spikatur në botë.
“Për momentin, mendoj se ai është më i miri në botë. Edhe pse i kanë munguar titujt, ajo që ka arritur në aspektin individual është mbresëlënëse. Shoh se parashikimet flasin për shumë baraspeshë, por mendoj se Topi i Artë i radhës duhet t’i takojë atij”, tha ai, raporton “Mundo Deportivo”.
Ai argumentoi më tej se trofetë nuk duhet të kenë më shumë peshë sesa shkëlqimi individual kur votuesit të bëjnë zgjedhjen e tyre.
“Ka lojtarë që fitojnë tituj, por mendoj se askush në botë nuk është në nivelin e tij si futbollist. I respektoj mendimet e të gjithëve, por ky është mendimi im.
“Topi i Artë duhet t’i takojë lojtarit më të mirë ose atij që ka dhënë paraqitjet më të mira dhe mendoj se nuk ka pasur askush si Kylian”, shtoi ai.
Megjithë admirimin e tij, Nzonzi nuk shkoi aq larg sa ta vendoste Mbappen në të njëjtin nivel me dy futbollistët që e kanë përcaktuar epokën moderne të futbollit.
“Ai është në rrugën e duhur, por ende nuk e ka arritur atë nivel. Ata janë legjenda të vërteta që kanë fituar gjithçka, si në aspektin individual, ashtu edhe në atë kolektiv, ndërsa Mbappes i mbetet ende shumë për të dëshmuar. Koha do ta tregojë”, shtoi ai.
Mbappe ka qenë një lloj lojtari i vetëm në repartin ofensiv të Real Madridit këtë sezon, duke shënuar nëntë gola në të gjitha garat, ndonëse gjithashtu ka shpërdoruar shumë raste të mira.
Kontributi i Mbappes do të jetë vendimtar, teksa Real Madridi po përgatitet për ndeshje të rëndësishme kundër Sevillas, Leipzigut dhe Barcelonës gjatë javës së ardhshme.
