Manuel Neuer e jep datën e mundshme për pensionim

Manuel Neuer ka folur për herë të parë hapur për momentin kur mund t’i japë fund karrierës së tij të jashtëzakonshme. Portieri dhe kapiteni 40-vjeçar i Bayern Munichut e di se fundi i rrugëtimit të tij në futboll po afrohet.

Neuer u nis të martën drejt kampit përgatitor të Bayernit në rajonin e Tegernsee, gati për të nisur sezonin e tij të 21-të në Bundesligë. Gjashtëmbëdhjetë prej tyre i ka kaluar me Bayern Munichun, ndërsa pesë të tjerët me Schalken. Pas pushimeve verore, që erdhën pas pjesëmarrjes së tij në Kupën e Botës, veterani bëri disa deklarata befasuese pas seancës së parë stërvitore.

I pyetur nga “Bild” nëse do të priste deri në fund të sezonit të ri për të vendosur mes rinovimit të kontratës ose pensionimit në verën e vitit 2027, kampioni i botës i vitit 2014 u përgjigj:

“Nuk hyj në ndeshje duke i thënë vetes se kjo është ndeshja ime e fundit, pavarësisht nëse është vizita ime e fundit në një stadium apo jo. Por këtë herë duket shumë e mundshme që t’i jap fund karrierës sime dhe të tërhiqem.”

I shpallur pesë herë portieri më i mirë në botë, Neuer rinovoi kontratën me Bayern Munichun edhe për një vit në maj të këtij viti. Ky vendim erdhi pas muajsh reflektimi, ku pensionimi ishte një mundësi shumë reale.

“Ndoshta në atë kohë isha 85% i prirur të tërhiqesha, por të qenit pjesë e këtij ekipi, me këtë staf teknik dhe këtë trajner, më jep shumë kënaqësi. Ne kemi gjithmonë mundësinë të luftojmë për çdo trofe dhe të jemi në majë. Pikërisht ai ambient dhe cilësia e skuadrës përbënin ato 15% që më bënë t’i thosha vetes: duhet patjetër të vazhdoj.”

Duke folur për motivimin e tij për sezonin e ri, veterani shtoi:

“Vazhdoj të luaj për pasionin tim personal dhe sepse e di që ende kam aftësinë të ndihmoj ekipin. Gjithashtu kam mbështetjen e madhe të familjes dhe miqve të mi.”

Gjithçka lë të kuptohet se ky do të jetë kapitulli i fundit i karrierës së tij. Neuer shpreson ta mbyllë atë në mënyrën më të bukur më 5 qershor 2027, kur finalja e Ligës së Kampionëve do të zhvillohet në stadiumin Metropolitano të Atletico Madridit. Një trofe i tretë evropian, pas atyre të viteve 2013 dhe 2020, do të ishte fundi ideal i një karriere legjendare.