Libri i javës     “Tetë malet” nga Paolo Cognetti

Libri i javës “Tetë malet” nga Paolo Cognetti

Kultura prill 15, 2019 - 10:03
Lexo më shumë detaje

 

Redaksia e gazetës “Zëri” së bashku me librarinë “Buzuku” në Prishtinë në kuadër të rubrikës “Libri i javës” këtë të hënë jua rekomandojnë për lexim librin “Tetë male”, nga Paolo Cognetti. Romani “Tetë male” është përkthyer në shqip nga Mimoza Hysa dhe është botuar nga shtëpia botuese “Dudaj”.

Ky roman tregon historinë e Pietros, është një djalë qyteti, vetmitar e paksa idhnak. E ëma punon në një konsultore periferie dhe dhuntia e saj është të shqetësohet për të tjerët. I ati është kimist, një njeri sedërmadh e magjepsës, që kthehet nga puna në shtëpi çdo ditë i xhindosur.

Prindërit e Pietros i lidh një pasion i përbashkët, themeltar: janë njohur, dashuruar, madje edhe janë martuar në mal, në rrëzë të Tri Majave të Lavaredos. Mali i ka lidhur ngaherë, edhe në tragjedi vija e horizontit të Milanos i ngjall herë keqardhje e herë mall. Kur zbulojnë fshatin e Granës, në rrëzë të Malit Roza, e ndiejnë se kanë gjetur bash atë që kërkonin: Pietroja do t’i kalojë të gjitha verat në atë vend “të mbyllur nga mali prej kreshtave ngjyrë hiri të metalizuar dhe nga lugina prej një shkëmbi të thepisur, që nuk linte shteg për të hyrë”, por i përshkuar prej një përroi që e magjeps Pietron sa e sheh.

Pikërisht aty e pret Brunoja, me flokë të verdhë si kashtë e qafë të djegur prej diellit: ka po të njëjtën moshë me të dhe në vend që të jetë me pushime kullot lopët. Fillojmë kështu verëra kërkimesh dhe zbulimesh mes shtëpive të braktisura, mullirit dhe shtigjeve gjithnjë e më të ashpra. Janë edhe vitet kur Pietroja zë të ngjitet maleve me të atin, “si një lloj edukimi që ka marrë prej tij”.

Paolo Cognetti (Milano, 1978) ka botuar “Doracak për vajza të suksesshme” (2004), “Një gjë e vogël që është gati të shpërthejë” (2007), “Sofia vishet gjithnjë me të zeza” (2012) dhe “Për peshkim në honet më të thella” (2014). Mbi temën e malit ka botuar edhe librin “Djali i egër” (2013), kurse me romanin “Tetë male” fitoi çmimin “Strega 2017”.

Romanin “Tetë male” nga Paolo Cognetti mund ta blini në librarinë “Buzuku” në Prishtinë për tetë euro.