Lufta për të drejtën e autorit vazhdon
Zyra për të Drejtat e Autorit dhe të Drejtat e Përafërta, e cila funksionon në kuadër të MKRS-së, ka organizuar të mërkurën konferencën rajonale me temë “E drejta e autorit në kohën digjitale”, shkruan sot gazeta "Zëri".
Në këtë konferencë, në të cilën u diskutua për rëndësinë e respektimit të së drejtës autoriale, mori pjesë edhe ministri i Kulturës, i Rinisë dhe i Sportit, Kujtim Gashi. Me këtë rast ministri Gashi foli rreth rëndësisë së krijimtarisë kulturore, inovacionit dhe zhvillimit të së drejtës së autorit në vendin tonë. “Kreativiteti dhe novacioni janë baza e krijimtarisë kulturore dhe ekonomike e një shoqërie. Edhe në kohën digjitale veprat e autorit krijohen me shumë mund dhe investim, ndërsa teknologjia e ka bërë të mundur që kopjet digjitale të veprave të bëhen shpejt dhe me shumë pak shpenzime e mund”, tha ministri Gashi.
Ai u shpreh i vendosur për të vazhduar punën në mbrojtjen e të drejtës së autorit në ambientin digjital. “Puna jonë ka qenë e bazuar në krijimin e sistemit të së drejtës së autorit dhe në luftimin e piraterisë fizike edhe ashtu në zhdukje falë zhvillimit të teknologjisë. Institucionet ligjzbatuese në kuadër të task-forcës kundër piraterisë, Inspektorati i Tregut, Policia dhe Dogana e Kosovës të koordinuara nga Zyra për të Drejtën e Autorit kanë marrë masa të vazhdueshme kundër shkeljeve të së drejtës së autorit. Mijëra mallra pirate janë sekuestruar dhe janë konfiskuar”, tha po ashtu ministri Gashi.
Tutje ai theksoi se viti 2018 është vit i të drejtës së autorit për Kosovën sepse pas pesë vjet negociatash është arritur marrëveshja e parë dhe historike për tarifat e përgjithshme për shfrytëzimin e muzikës nga transmetuesit në territorin e Republikës së Kosovës, janë miratuar tarifat për kompensime të veçanta. “Ministria që drejtoj unë deri në fund të marsit të vitit 2019 do t’i propozojë edhe tarifat për operatorët kabllorë, në këtë mënyrë do të funksionalizohet menaxhimi kolektiv i të drejtave të autorit. Ne jemi duke ecur përpara dhe sigurt për të krijuar një ambient ku të drejtat e autorit zbatohen dhe autorët e krijuesit gëzojnë mbrojtje dhe përftime ekonomike nga veprat e tyre. Kosova çdo ditë e më shumë po mbron autorin”, u shpreh ministri Gashi.Në fund ministri Gashi falënderoi për pjesëmarrjen e tyre përfaqësuesit e zyrës hungareze, përfaqësuesit shqiptarë, avokatët Randaza nga SHBA-ja dhe nga Bogataj, Slloveni. Zëri
