Shkrimtarët që garojnë për 'Man Booker 2018'
Tashmë janë bërë të ditur trembëdhjetë kandidatët që garojnë sivjet për çmimin “Man Booker”, i cili jepet për përkthimin më të mirë në gjuhën angleze. E dihet që kritikët, të nominuarit për këtë çmim, i vlerësojnë si ajka e shkrimtarëve bashkëkohorë.
Përmes këtij çmimi, që jep një fitues të vetëm për çdo edicion, puna e përkthyesve shpërblehet në mënyrë të barabartë, me vlerë monetare prej 50,000 funtesh, mjete këto që ndahen midis autorit dhe përkthyesit. Përveç kësaj, çdo autor dhe përkthyes i nominuar do të marrë 1,000 euro. Për këto 13 nominime që juria ka zgjedhur sivjet, janë shqyrtuar 108 libra.
Nëse i hedhim një sy kësaj liste kuptojmë se sivjet ajo ka një shtrirje të gjerë gjeografike, pasi që për “Man Booker 2018” janë nominuar shkrimtarë nga Franca, Spanja e deri te Koreja e Jugut. Në këtë listë nuk mungojnë as shkrimtarët nga Argjentina, Polonia, apo Japonia.
Lista e plotë e të nominuarve për sivjet është kjo: Laurent Binet (Francë), Sam Taylor, The 7th Function of Language (Harvill Secker), Javier Cercas (Spanjë), Frank Wynne, The Impostor (MacLehose Press), Virginie Despentes (Francë), Frank Wynne, Vernon Subutex 1 (MacLehose Press), Jenny Erpenbeck (Gjermania), Susan Bernofsky, Go, Went, Gone (Portobello Books), Han Kang (Korea Jugore), Deborah Smith, The White Book (Portobello Books), Ariana Harwicz (Argjentina), Sarah Moses & Carolina Orloff, Die, My Love (Charco Press), László Krasznahorkai (Hungaria), John Batki, Ottilie Mulzet & George Szirtes, The World Goes On (Tuskar Rock Press), Antonio Muñoz Molina (Spanja), Camilo A. Ramirez, Like a Fading Shadoë (Tuskar Rock Press), Christoph Ransmayr (Austria), Simon Pare, The Flying Mountain (Seagull Books), Ahmed Saadaëi (Iraku), Jonathan Wright, Frankenstein in Baghdad (Oneëorld), Olga Tokarczuk (Polonia), Jennifer Croft, Flights (Fitzcarraldo Editions), Wu Ming-Yi (Taivani), Darryl Sterk, The Stolen Bicycle (Text Publishing), Gabriela Ybarra (Spanja) dhe Natasha Wimmer, The Dinner Guest (Harvill Secker).
Të gjithë këta shkrimtarë do të vlerësohen nga një juri e përbërë nga Lisa Appignanesi, Michael Hofman, Hari Kunzru, Tim Martin dhe Helen Oyeyemi.
Lisa Appignanesi, kryetare e panelit gjykues të çmimit ndërkombëtar të “Man Booker 2018” është shprehur e kënaqur që lista finale e të nominuarve ka sjellë një diversitet autorësh.
"Analizimi i propozimeve për çmimin ndërkombëtar të ‘Man Booker’ ka qenë një aventurë joshëse. Ne kemi udhëtuar nëpër vende, kultura e imagjinata deri sa kemi arritur në këtë listë që mund të ishte një listë e gjatë, edhe më e gjatë. Kjo listë është një listë që prezanton një pasuri talentesh e formash të ndryshme, ku janë edhe disa shkrimtarë, më parë pak të njohur në gjuhën angleze. Ka shkrimtarë të mëdhenj dhe ne shpresojmë që lexuesit të marrin sa më shumë kënaqësi në zbulimin e punës së tyre, ashtu siç bëmë edhe ne”, ka thënë Appignanesi.
Fillimisht kjo juri do të shpallë listën me gjashtë finalistë për “Man Booker 2018” më 12 prill në një aktivitet në “Somerset House” në Londër, ndërsa fituesi i çmimit të do të shpallet më 22 maj në një darkë në Muzeun Victoria & Albert në Londër.
Çmimi “Man Booker”, bashkë me cmimin “Man Booker për Fiksion”, shpërblejnë më të mirët e globit që botohen në Mbretërinë e Bashkuar.
Ky çmimi sponsorizohet nga Man Group, një firmë aktive për menaxhimin e investimeve, e cila gjithashtu sponsorizon çmimin “Man Booker për Fiksion”.
Më parë me këtë çmim të rëndësishëm të letërsisë është vlerësuar dhe shkrimtari ynë Ismail Kadare, ndërsa dy vjet më parë libri i tij “Kamarja e turpit” ishte sërish kandidat për këtë çmim nën përkthimin e John Hodgson.
A.S.
