Reagojnë njohësit e ligjit: Pas vrasjes së imamit në Zlipotok, shpërthyen komente fyese në rrjete sociale [Video]

Vrasja e imamit të fshatit Zlipotok në Dragash Gazmend Tahirovci është shoqëruar me komente fyese e nxitje të urrejtjes nga disa përdorues në rrjetet sociale.

Sipas njohësve të ligjit, kjo përbën vepër penale ndërsa ka edhe elemente të Islamofobisë.

Për këtë, thonë se ka edhe një shkaktar.

Janë vetëm disa nga komentet që u shkruan në rrjetet sociale të martën.

Në këtë formë, u shprehen disa komentues, për vrasjen e imamit të fshatit Zlipotok.

E gjitha ngjarja tragjike ndodhi të hënën në sytë familjarëve.

Pavarësisht se ishte viktimë e rastit, këta përdorues nuk i kursyen komentet fyese.

E kjo, sipas profesorit të gazetarisë, Festim Rizanaj, lidhet edhe me raportimet e nxituara.

“Në rastet e tilla shpesh po vërehet që po nguten gjatë raportimeve për shkak se po ka spekulime për arsyet e vrasjeve e forma të tilla dhe kjo në një farë forme po lënë hapësirë për keqinterpretim të situatës derisa organet kompetente, Policia e Kosovës po e konfirmon arsyen e rastit apo ngjarjes që po ndodh dhe kështu që në një farë forme po lënë hapësirë për për keqinterpretim”, ka thënë Rizanaj.

E kjo gjuhë e urrejtes sipas Rizanajt ka filluar të normalizohet në sferen digjitale.

“Vetë identiteti i hoxhës tregon që tema e religjionit, po njëkohësisht edhe e politikës, janë tema mbi të cilat më së shumti krijohen denigrimet e stigmatizim të ndryshme dhe kjo tregon një intolerancë të qytetarëve dhe të atyre të cilët komentojnë kësaj gjuhe, domethënë gjuhë të urrejtjes, dhe janë dy tema që, që ndoshta më së shumti e lënë hapësirë për, për gjuhë të urrejtjes dhe denigruese në media sociale”, theksoj tutje Rizanaj.

E njohësit e ligjit, thonë se vepra penale e “Nxitjes së Urrejtjes” parasheh dënim deri në pesë vite burgim.

Ndërsa një gjuhë e tillë, sipas avokatit Asdren Bytyqi, ka edhe elemente të Islamofobisë.

“Mendoj që Lëvizja e Deçanit është një lloj inkubatori i fuqishëm i cili i ka ringjallur ndjenjat e urrejtjes së një pjesë të theksuar të shoqërisë shqiptare të besimeve të ndryshme që në esencë e kanë islamofobinë si pjesë të identitetit të tyre, urrejtjen ndaj islamit dhe myslimanëve e që natyrisht kjo i ka mobilizuar forcat dhe e ka ndiejnë grup politik të përkatësisë dhe i ka shty edhe më shumë që të sulmojnë, duke pa që deri më tani ende nuk janë të akuzuar zyrtarisht asnjëri prej tyre”, u shpreh Bytyqi.

Ndryshe, e gjithë ngjarja tragjike në fshatin Zlipotok të Dragashit, dyshohet se erdhi pas mosmarrëveshjeve rreth një are.

Ndërsa për rastin, u arrestua B.H dhe babai i tij. /tëvë1