Gjykata në Ferizaj dënon një kompani dhe një person për mashtrim, dënim me burg dhe gjoba
Gjykata Themelore në Ferizaj ka shpallur aktgjykim dënues ndaj personit juridik “E.D&C” SHPK dhe të pandehurit V.H., për veprën penale të mashtrimit.
Sipas Gjykatës, kompania “E.D&C” SHPK u shpall fajtore për veprën penale "Mashtrim", sipas Kodit Penal të Republikës së Kosovës dhe u dënua me gjobë në shumën prej 6,000 eurove. Kjo shumë duhet të paguhet brenda 30 ditësh pasi aktgjykimi të marrë formën e prerë.
Ndërkaq, i pandehuri V.H. u shpall fajtor për të njëjtën vepër penale dhe u dënua me dy vjet burgim, si dhe me gjobë prej 2,000 euro. Dënimet do të ekzekutohen pasi aktgjykimi të bëhet i plotfuqishëm.
Sipas aktakuzës, rasti kishte ndodhur më 15 maj 2019 në Ferizaj, kur përmes personit përgjegjës V.H., kompania kishte mashtruar një qytetar me inicialet R.H. Duke u paraqitur rrejshëm se mund të siguronin një grant bujqësor të financuar nga shtete të huaja, ata i kishin kërkuar të dëmtuarit të paguante 4,280 euro në llogarinë e kompanisë, duke i premtuar se do të përfitonte një traktor në vlerë rreth 25,000 euro.
Po ashtu, viktima kishte paguar edhe 800 euro shtesë për përgatitjen e një plani biznesi. Megjithatë, pas pagesave, të pandehurit nuk i kishin kthyer më përgjigje dhe nuk ishte realizuar asnjë grant, duke i shkaktuar të dëmtuarit dëm material rreth 5,080 euro.
Gjykata ka caktuar ndaj të pandehurit edhe masën e paraburgimit deri në momentin kur aktgjykimi të marrë formën e prerë, por jo më gjatë se koha e dënimit të shqiptuar.
Palët kanë të drejtë ankese brenda 30 ditësh nga pranimi i aktgjykimit me shkrim në Gjykata e Apelit në Prishtinë, përmes Gjykatës Themelore në Ferizaj. /Zëri
