![Ankohen fermerët, migrimi po shkakton ngecje në zhvillimin ekonomik](/uploads/zeri.info/images/2024/March/13/auto_auto_bujqesi16544213581710321710.jpg)
Ankohen fermerët, migrimi po shkakton ngecje në zhvillimin ekonomik
Kosova ka mundësi të mëdha për blegtori dhe për këtë fushë nuk ka munguar as mbështetja institucionale. Megjithatë, sfidë për zhvillimin e kësaj dege mbetet zhvendosja nga fshati në qytet, por edhe migrimi i të rinjve drejt shteteve perëndimore.
Nga Gjermania, Naim Demolli ishte kthyer në vendlindje në Kamenicë për të investuar në ngritjen e stallës së lopëve, por në mungesë të mbështetjes institucionale, është detyruar të ndërpresë veprimtarinë.
Tokën e privatizuar Demolli e lëshoi me qira, ndërsa liroi punëtorët për shkak të mbylljes së fermës.
Demolli thotë se shteti duhet të kujdeset për fermat.
“Ministria e Bujqësisë duhet me shkuar me i përcjellë fermerët çka punojnë, jo me këqyr dokumente...me përcjell kush po punon”, theksoi ai për RTK-në.
Zyrtarë të Komunës së Kamenicës thonë se janë të përkushtuar t’i mbështesin fermerët.
“Bujqësia kërkon fuqi fizike dhe moshë kryesisht të re e largimi po ndodh kryesisht i moshës së re…dhe kryesisht ndikon edhe në familje. Sigurisht edhe kjo ndikon ndoshta në pakësimin e punës dhe pakësimin e kafshëve dhe sipërfaqeve të punuara”, Shpend Morina, drejtor për Bujqësi, Kamenicë.
Morina thotë se migrimi është problem që po e përcjell vendin.
“Familjet të cilët i kanë pasur të rinjtë këtu deri në një kohë kanë pasur kapacitete e prioritete më të mëdha, ndërsa disa prej tyre kanë zvogëluar kapacitet për shkak të mungesës së fuqisë punëtore”, tha ai.
Edhe zvogëlimi i kapaciteteve prodhuese në bujqësi është evident si pasojë e migrimit të të rinjve.