![BQK: Sistemi ndërbankar i pagesave, plotësisht funksional](/uploads/zeri.info/images/2024/May/13/auto_Bedri_Hamzaj-BQK-_23_janar_2014f-Laura_Hasani_copy1715610133.jpg)
BQK: Sistemi ndërbankar i pagesave, plotësisht funksional
Banka Qendrore e Republikës së Kosovës (BQK) ka bërë të ditur se sistemi ndërbankar i pagesave (SNP), i cili është një sistem kombëtar i pagesave, është plotësisht funksional dhe nuk ka pasur asnjë ndërprerje në aktivitetin e tij.
Ky njoftim bëhet për të informuar në mënyrë të drejtë dhe të plotë përdoruesit e shërbimeve bankare.
Megjithatë, disa nga shërbimet online të ndonjë banke të caktuar janë ndikuar pjesërisht nga problemet globale me shërbimet e kësaj natyre. Në atë rast, edhe këto shërbime po rikthehen gradualisht nga banka, pa asnjë pasojë.
“BQK-ja bën me dije se nuk ka pasur sulme kibernetike në sistemin bankar dhe nuk ka pasur asnjë rrezik për të dhënat ose sistemet. Si pasojë e disa ndryshimeve teknike të aplikuara nga ofrues global të shërbimeve, disa nga shërbimet online janë kufizuar për një kohë të caktuar. Sistemi bankar është funksional dhe nuk ka asnjë arsye për shqetësim. Shërbimet bankare po ofrohen nga bankat përmes kanaleve të tyre fizike dhe digjitale”, thuhet në njoftim. /Zëri