Epidemi parazitësh në SHBA, mijëra raste të reja brenda një jave

Sekretari i Shëndetësisë i SHBA-së, Robert F. Kennedy Jr., njoftoi pak më shumë se një javë më parë se shpërthimi i një paraziti që shkakton çrregullime të rënda të tretjes ishte nën kontroll. Megjithatë, raste të reja infeksioni po regjistrohen në të gjithë SHBA-në, shkruan Futurism.

Sipas Qendrave për Kontrollin dhe Parandalimin e Sëmundjeve (CDC), 2,500 raste të reja u raportuan vetëm midis 21 dhe 28 korrikut. Në total, CDC ka konfirmuar më shumë se 6,700 raste që nga 1 maji, dhe agjencia shtoi se është në dijeni të më shumë se 11,500 rasteve të tjera që presin konfirmim laboratorik ose analiza të mëtejshme.

Edhe pse simptomat janë jashtëzakonisht të pakëndshme, lajmi i mirë është se deri më tani nuk janë raportuar vdekje. 423 persona janë shtruar në spital, por askush nuk ka vdekur. Ekspertët e shëndetit ende po hetojnë burimin e infeksionit me parazitin Cyclospora cayetanensis, i cili shkakton diarre të shpeshtë dhe të papritur me ujë.

Numri i saktë i personave të infektuar është i vështirë të përcaktohet.

Taylor Farms, një furnizues kryesor i zinxhirit të restoranteve Taco Bell, është nën dyshimin më të madh pasi Administrata Amerikane e Ushqimit dhe Barnave (FDA) njoftoi fillimisht se kishte gjetur gjurmë parazitësh në sallatën e tyre të grirë të paketuar.

FDA më vonë e tërhoqi pretendimin, duke thënë se ishte një pozitiv i rremë. Megjithatë, Taylor Farms ka rënë dakord të tërheqë vullnetarisht sallatën nga tregu. Numri i saktë i njerëzve që janë infektuar është i vështirë të përcaktohet. “Shumë shërohen pa kujdes mjekësor dhe nuk testohen fare për ciklosporë”, tha CDC.

Një hartë e publikuar nga CDC tregon se vatrat kryesore të epidemisë janë shtetet e Miçiganit dhe Ohios. Vetëm në Miçigan, sipas Departamentit të Shëndetësisë atje, numri i të infektuarve ka tejkaluar 10,000. Infeksioni nuk është raportuar ende vetëm në Montana, New Mexico, Maine, South Carolina dhe Hawaii.

Mbrojtja nga parazitët është e thjeshtë. Ekspertët rekomandojnë larjen e plotë të frutave dhe perimeve ose trajtimin termik të ushqimeve, sepse temperaturat e larta shkatërrojnë mikroorganizmat.