Zvicër: Peticion për pushim më të gjatë të lindjes

Një peticion përkatës me rreth 111,000 nënshkrime është dorëzuar në Kancelarinë Federale. Aktualisht, pushimi i lehonisë në Zvicër është 14 javë

Nënat zvicerane duhet të kenë të drejtë për gjashtë muaj leje lindjeje. Një peticion përkatës me rreth 111,000 nënshkrime është dorëzuar në Kancelarinë Federale. Aktualisht, pushimi i lehonisë në Zvicër është vetëm 14 javë, transmeton albinfo.ch. Kjo është shumë e shkurtër për një fazë të rëndësishme në jetën e një fëmije, shkruajnë iniciatorët.

Afërsia me fëmijën, ushqyerja me gji dhe lidhja me të janë thelbësore për zhvillimin e fëmijës, thuhet veç tjerash në peticion.

Nënat gjithashtu kanë nevojë për më shumë kohë për rikuperim fizik dhe mendor pas shtatzënisë dhe lindjes, shkruan srf.ch. Prandaj, peticioni bën thirrje për një Zvicër më miqësore ndaj familjes.

Me 14 javë leje lindjeje statutore, Zvicra renditet pothuajse në fund të listës në krahasimet evropiane dhe është ndër vendet me performancën më të dobët. Mesatarja e BE-së dhe standardet e OECD-së e tejkalojnë shumë këtë kohëzgjatje.

Mesatarisht, shtetet anëtare të BE-së u japin nënave rreth 66 javë leje prindërore të paguar dhe të papaguar (periudha e pastër e lejes së lindjeve është të paktën 14 javë në të gjithë BE-në, por shumë vende ofrojnë dukshëm më shumë).