Vala e hershme e të nxehtit në Spanjë, mbi 100 viktima vetëm gjatë muajit maj
Temperaturat jashtëzakonisht të larta të regjistruara gjatë muajit maj kanë shkaktuar një numër rekord vdekjesh të lidhura me të nxehtin në Spanjë, edhe para fillimit zyrtar të verës meteorologjike.
Sipas të dhënave të sistemit spanjoll të monitorimit të vdekshmërisë (MoMo), gjatë muajit maj janë regjistruar 101 vdekje të lidhura me temperaturat e larta, shifra më e lartë e regjistruar ndonjëherë për këtë muaj që nga fillimi i monitorimit në vitin 2015.
Autoritetet shëndetësore bëjnë të ditur se ky numër është 3.6 herë më i lartë se mesatarja e vdekjeve të lidhura me vapën gjatë muajit maj në dekadën e fundit.
Ministrja spanjolle e Shëndetësisë, Mónica García, tha se temperaturat ekstreme po shfaqen gjithnjë e më herët gjatë vitit, duke e bërë më të vështirë përshtatjen e organizmit të njeriut.
“Problemi nuk është vetëm se temperaturat po rriten, por se vala e të nxehtit po vjen gjithnjë e më herët dhe organizmi nuk ka pasur kohë të përshtatet”, deklaroi ajo gjatë prezantimit të Planit Kombëtar 2026 për Parandalimin e Efekteve të Temperaturave Ekstreme në Shëndet.
Sipas Ministrisë së Shëndetësisë së Spanjës, rreziku i vdekshmërisë rritet nga 9.1 deri në 10.7 për qind për çdo gradë Celsius mbi pragun e temperaturës që konsiderohet i rrezikshëm për shëndetin.
Të dhënat afatgjata tregojnë gjithashtu ndikimin e madh të valëve të të nxehtit në vend.
Midis viteve 2015 dhe 2025, sistemi MoMo ka vlerësuar se 27.564 persona kanë humbur jetën si pasojë e temperaturave të larta.
Viti më vdekjeprurës rezultoi 2022, me 4.789 viktima të lidhura me vapën, ndërsa në vitin 2025 u regjistruan 3.832 vdekje.
Ekspertët paralajmërojnë se ndryshimet klimatike po shtojnë frekuencën dhe intensitetin e valëve të të nxehtit në Evropë, duke rritur rrezikun për shëndetin publik, veçanërisht tek të moshuarit dhe personat me sëmundje kronike.
