Edhe Jakup Krasniqi i reagon Kryeministrit Mustafa

Edhe Jakup Krasniqi i reagon Kryeministrit Mustafa

Aktuale korrik 11, 2016 - 11:55

Kryetari i Këshillit Kombëtar  nga radhët e Nisma-s, Jakup Krasniqi ka reaguar pas deklaratës së Kryeministrit Mustafa i cili ka thënë se demarkacioni nuk është shkencë por është çështje politike.

Në lidhje me këtë Krasniqi ka thënë se parametrat e kryeministrit nuk mund të jenë gjë tjetër përveç parametra të tradhtisë./ZERI

Ky është reagimi i plotë i Krasniqit:

KUFIRI PËRCAKTOHET ME PARAMETRA SHKENCOR-PAZARET POLITIKE JANË TRADHTI

Populli ynë ka shumë urti (mençuri) popullore. Njëra nga ato thotë: “Sa të jetosh mëson”! Thuhet se ketë e kishte thënë plaku 70 vjeçar, pasi kishte marrë një mësim nga fëmija 7 vjeçar sesi mund të merret zjarri në shuplakë të dorës!

Neve, qytetarëve të Kosovës shpesh po na bie të dëgjojmë e mësojmë lloj-lloj “xhevahiresh”. E njëra nga këto është “xhevahiri” që këto ditë e tha akademiku – kryeministër?! “Demarkacioni nuk është shkencë, është çështje politikë”!!! Zbulim epokal i cili mund të krahasohet me zbulimin e rrotës, apo jo?!

Kësaj që e ka thënë kryeministri mund t’i themi: Vetëm shkenca e përcakton demarkacionin mbi bazën e parametrave shkencor. Ndërsa, parametrat politik te kryeministrit, nuk mund të jenë gjë tjetër veçse, parametra të tradhtisë!

Të përfundojmë: Parametrat “politik” të kryeministrit e të aleatëve të tij, nuk janë gjë tjetër, veçse përpjekje për t’ju ikur ndjekjeve penale!