Rama me ambasadorin francez, diskutojnë për Lojërat Mesdhetare

Kryetari i Prishtinës, Përparim Rama, ka pritur në Odën e Kryeqytetit ambasadorin e ri të Francës në Kosovë, Jean-François Huchet, me të cilin ka diskutuar për mundësitë e bashkëpunimit në fusha të ndryshme.

Përmes një postimi në Facebook, Rama bëri të ditur se gjatë takimit u diskutua për shkëmbimet mes shkollave, mësimin e gjuhës frënge, si dhe nisma të përbashkëta në arsim, kulturë dhe teknologji.

Postimi i plotë:

Partneritetet kanë vlerë kur krijojnë mundësi për të rinjtë dhe projekte që i mbesin qytetit.

Në Odën e Kryeqytetit, prita Ambasadorin e ri të Francës, Jean-François Huchet. Diskutuam për shkëmbime mes shkollave, mësimin e gjuhës frënge dhe nisma të përbashkëta në arsim, kulturë e teknologji.

Prishtina 2030 kërkon angazhim të përbashkët dhe përshpejtim të përgatitjeve andaj bashkëpunimi me Francën mund të ndihmojë që kjo mundësi e madhe të kthehet në projekte që do t’i shërbejnë qytetit edhe shumë pas vitit 2030.