Hapësira ajrore e Kosovës nën përgjegjësinë e Islandës deri më 2028

Misioni i NATO-s në Kosovë, KFOR, dhe Islanda kanë nënshkruar në Reykjavik një marrëveshje për zgjatjen e bashkëpunimit lidhur me hapësirën ajrore mbi Kosovë deri më 31 dhjetor 2028.

Marrëveshja e zgjatjes siguron vazhdimin e partneritetit ndërmjet KFOR-it dhe Qeverisë së Islandës, e cila vepron përmes Autoritetit Islandez të Transportit (ICETRA).

Sipas KFOR-it, qëllimi i marrëveshjes është të lehtësojë futjen e linjave të reja komerciale në hapësirën e ulët ajrore mbi Kosovë, transmeton Zeri.info.

“Kjo marrëveshje ndërtohet mbi bashkëpunimin afatgjatë ndërmjet KFOR-it dhe Islandës dhe kontribuon në përpjekjet e vazhdueshme për të siguruar përdorimin e sigurt dhe efikas të hapësirës së ulët ajrore mbi Kosovë”, thuhet në njoftimin e KFOR-it.

Bashkëpunimi ndërmjet KFOR-it dhe Islandës në këtë fushë synon të mbështesë menaxhimin e sigurt të hapësirës ajrore dhe krijimin e kushteve për zhvillimin e mëtejshëm të trafikut ajror komercial. /Zëri