Britania e Madhe dënon deklaratat e ministres serbe për Kosovën

Mbretëria e Bashkuar ka dënuar deklaratat e ministres serbe Snezhana Paunoviq, të cilat përfshijnë referenca për spastrimin etnik të Kosovës, duke i cilësuar ato si të papranueshme.

Në një deklaratë, zëdhënësi i Zyrës për Punë të Jashtme, Commonwealth dhe Zhvillim (FCDO) tha se këto komente janë "krejtësisht të neveritshme dhe nuk kanë vend në shoqërinë e sotme".

“Ne i dënojmë deklaratat e ministres serbe Snezana Paunovië, duke përfshirë referencat për spastrimin etnik të Kosovës. Ato janë krejtësisht të neveritshme dhe nuk kanë vend në shoqërinë e sotme”, thuhet në deklaratë, transmeton Zeri.info.

Sipas FCDO-së, në një kohë kur vendet e Ballkanit Perëndimor janë të përqendruara në ndërtimin e një të ardhmeje paqësore, stabile dhe multietnike, deklarata të tilla synojnë të rihapin ndarjet e vjetra dhe të nxisin tensione.

“Liderët politikë të përgjegjshëm duhet ta refuzojnë një gjuhë të tillë qartë dhe pa asnjë mëdyshje”, theksohet më tej.

Në fund të deklaratës, autoritetet britanike theksojnë se kanë marrë parasysh edhe distancimin e presidentit të Serbisë, Aleksandar Vuçiq, nga komentet e ministres Paunoviq.

“Ne marrim parasysh refuzimin që presidenti Vuçiq ua bëri këtyre komenteve”, përfundohet në deklaratë. /Zëri