Finalja e madhe
Sezonit 2017/18 në basketbollin kosovar po i vjen fundi. Këtë fundjavë do të fillojë seria finale e “Play-Off”-it të Superligës, ku do të përballen dy skuadrat absolutisht më të mira të pjesës së rregullt të sezonit, por edhe të gjysmëfinales së “Play-Off”-it, Sigal Prishtina dhe Bashkimi.
Bardhekaltrit e eliminuan në finale Golden Eagle Yllin, kurse Bashkimi ishte më i mirë se Rahoveci. Meqenëse të dy finalistët fituan 3-0 në serinë finale, atyre u është dhënë pushim një javë nga Federata e Basketbollit të Kosovës (FBK), e cila e kishte lënë një hapësirë me mundësinë që seria gjysmëfinale të shkonte deri në pesë lojë.
Sidoqoftë, sonte është nata e madhe e basketbollit kosovar, pasi nga ora 19:00 në Pallatin e Rinisë dhe të Sporteve në Prishtinë do të luajnë Bardhekaltrit ndaj ekipit Portokalli.
Njohësit e basketbollit ditë më parë i kanë thënë “Zërit” se këtë radhë nuk ka favorit, pasi gjasat për t’u shpallur kampionë të dyja skuadrat i kanë 50 me 50 për qind. Andaj, priten ndeshje mjaft interesante dhe të nivelizuara.
Prishtinasit mund të llogarisin në armën e tyre të fortë – lojtarët vendorë, kurse prizrenasit do të përqendrohen te lojtarët e huaj, që e bartin barrën kryesore gjatë këtij sezoni.
Sigal Prishtina, pasi e fitoi Kupën e Kosovës, synon ta kompletojë sezonin në mënyrën më të mirë të mundshme. Nga ana tjetër, Bashkimi dëshiron t’i japë fund pritjes së gjatë dhe më në fund ta dërgojë titullin e kampionit në Prizren, të parin pas luftës.
Në bazë të rregullave të FBK-së, ekipi që i regjistron tri fitore shpallet kampion i Kosovës për sivjet. Kampion aktual është Sigal Prishtina.
Superliga – Finalja e “Play-Off”-it
E shtunë
19:00 Sigal Prishtina – Bashkimi
Kampionët e pasluftës në Kosovë
1999/2000 Trepça
2000/2001 Trepça
2001/2002 Prishtina
2002/2003 Prishtina
2003/2004 Dukagjini
2004/2005 Mabetex
2005/2006 Prishtina
2006/2007 Prishtina
2007/2008 Prishtina
2008/2009 Prishtina
2009/2010 Prishtina
2010/2011 Prishtina
2011/2012 Trepça
2012/13 Peja
2013/14 Prishtina
2014/15 Prishtina
2015/16 Prishtina
2016/17 Prishtina
2017/18 ?
