Haradinaj të rinjve në Suharekë u premton bursa e grante pa kthim

Sot, Aleanca për Ardhmërinë e Kosovës ka mbajtur një takim me të rinjt në Suharekë.

Kreu i kësaj partie, Ramush Haradinaj u premtoi mbështetje me grante për bizneset e reja, raporton Zeri.info.

Ai po ashtu premtoi edhe bursa për të gjithë studentët qoftë në universitetet publike apo private.

“Në Shirokë të Suharekës pashë vendosmërinë e një gjenerate që di të mendojë, të punojë dhe të ndërtojë. Këta të rinj, nga një qytet që ka dëshmuar se di të krijojë vlera e zhvillim ekonomik, janë shembull i asaj që Kosova mund të arrijë.

Rininë do ta mbështesim me grante pa kthim për bizneset e reja.

Bursa për të gjithë studentët, si në universitetet publike ashtu edhe në ato private.

Për përgatitjen e tyre profesionale, 6% e GDP-së do të ndahet për arsim e edukim.

Këto janë investime që do të nisin menjëherë pas 9 shkurtit.

Çelësi i zhvillimit të vendit është i qartë - anëtarësimi direkt në NATO dhe forcimi i aleancës së përhershme me Amerikën.

Rinia e Suharekës e ka dëshmuar se e kupton këtë vizion dhe se masovikisht është bashkuar për Kosovën Fituese”, shkroi ai në Facebook. /Zëri