Zhegrova në formë të lartë, mediat italiane: Mesazh i qartë për Spallettin
Paraqitjet e fundit të Edon Zhegrovës me Kombëtaren e Kosovës kanë tërhequr vëmendjen e mediave italiane.
Mediumi i njohur italian “Calciomercato” i ka kushtuar një artikull të veçantë sulmuesit kosovar.
Zhegrova u inkuadrua në pjesën e dytë në ndeshjen ndaj Austrisë, të cilën Kosova e humbi 3:1, ndërsa ishte pikërisht ai që shënoi golin e vetëm të “Dardanëve”, duke realizuar nga pika e bardhë.
Pavarësisht humbjes së Kosovës, mediumi italian e vlerëson formën e mirë të Zhegrovës, duke theksuar se ai tashmë ka regjistruar tre gola dhe një asistim në gjashtë ndeshjet e para të këtij sezoni.
“Penalltia nuk e largoi humbjen ndaj Austrisë, por konfirmoi formën e mirë të Edon Zhegrovës. Me këtë gol, ai ka arritur në tre gola dhe një asistim në gjashtë ndeshjet e para të sezonit”, shkruan “Calciomercato”.
Sipas mediumit italian, kjo formë mund të jetë edhe një sinjal për trajnerin e Juventusit, Luciano Spalletti, i cili mund t’i japë Zhegrovës më shumë hapësirë në vazhdim të sezonit.
“Ky është gjithashtu një mesazh i rëndësishëm për Luciano Spallettin, i cili sezonin e kaluar nuk arriti të mbështetej vazhdimisht te versioni më i mirë i Zhegrovës”, vijon artikulli.
“Calciomercato” thekson se kosovari mund të përfshihet më shumë në rotacionin e Juventusit dhe se tashmë mund të konkurrojë me Francisco Conceicaon për një vend në formacionin bazë.
Me skemën 4-2-3-1 të preferuar nga Spalletti, Zhegrova shihet si një alternativë për krahun e djathtë të sulmit, pozitë ku aktualisht aktivizohet edhe Conceicao.
Megjithatë, para rikthimit te Juventusi, Zhegrova është i fokusuar te Kombëtarja e Kosovës. “Dardanët” të enjten do të përballen me Izraelin në Hungari, në kuadër të Ligës së Kombeve. /rtk
