Gordoni paralajmëron kundërshtarët, thotë se starti i furishëm i Barçës vështirë të ndalet

Anthony Gordon ka lëshuar një paralajmërim të fortë për rivalët, duke këmbëngulur se Barcelona ka ndërtuar një skuadër jashtëzakonisht të gjithanshme, të aftë për të çmontuar çdo kundërshtar.

Sulmuesi anësor anglez beson se shumëllojshmëria e madhe e profileve në sulm te klubi do ta bëjë pothuajse të pamundur për ekipet kundërshtare që t’i pengojnë të shënojnë, teksa vazhdojnë startin e tyre sensacional në sezonin e ri.

Gordon po e shijon shumë muajt e tij të parë në Spanjë, duke admiruar fleksibilitetin taktik që Hansi Flick ka sjellë në skuadër. Duke folur për mediat e klubit, Gordon paralajmëroi kundërshtarët për zgjidhjet e pafundme që Barcelona ka në sulm.

“Jam shumë i lumtur, ne e dimë se për çfarë jemi të aftë. Mendoj se do të jetë shumë e vështirë të na pengojnë të shënojmë”, deklaroi Gordon.

“Mendoj se cilësia kryesore e kësaj skuadre është se gjejmë një zgjidhje në çdo situatë të lojës. Pra, çfarëdo që të bëjë skuadra tjetër, mendoj se ne mund të gjejmë një zgjidhje”, shtoi ai.

Pavarësisht largimit të disa figurave të mëdha, Gordon beson se përforcimet e reja kanë krijuar një njësi të kompletuar.

“E di se disa lojtarë të mëdhenj si Ferran, Rashford apo Lewandowski u larguan, por janë transferuar edhe lojtarë të mirë. Dhe tani vërtet ndihemi si një skuadër”, tha ai.

“Ne kemi karakteristika të ndryshme. Kemi dy lojtarë numër 10, Fermín dhe Dani Olmo, krejtësisht të ndryshëm… Lamine mund të luajë në çdo pozitë, Raphinha është një profil tjetër. Karim dhe unë. Kemi disa mesfushorë qendre me karakteristika të ndryshme: mund ta zhbllokojmë çdo mbrojtje. Siç thashë: golat mund të vijnë nga kudo. Xavi Espart, mbrojtësi i majtë, shënoi një ditë më parë. Është shumë më e rrezikshme të kesh një skuadër të tillë”, u shpreh ai.

Gordon pranoi se forma e jashtëzakonshme e skuadrës e ka befasuar.

“Prisja të fitonim çdo ndeshje, por ndoshta jo të shënonim nga pesë gola, kështu që duhet të them se nuk e prisja. Nëse do të thosha se prisja të shënonim pesë gola në kaq shumë ndeshje, nuk do të ishte e vërtetë”, pranoi ai. Ai ia atribuon këtë produktivitet përgatitjeve të tyre të përditshme.

“Stërvitja për mua të përgatit për ndeshjet. Nëse stërvitesh fort, ndeshja bëhet shumë më e lehtë, sepse në stërvitje luan kundër më të mirëve dhe intensiteti është aty. Duhet të mbrohesh, duhet të sulmosh. Gjithçka që përfshin kjo. Pastaj vjen ndeshja dhe skuadra kundër së cilës luan nuk e ka atë nivel lojtarësh”, e mbylli anglezi.