Kvaratskhelia synon ta dërgojë PSG-në sërish drejt finales së Ligës së Kampionëve

Ylli gjeorgjian i Paris Saint-Germain, Khvicha Kvaratskhelia, ka deklaruar se është i motivuar maksimalisht për të ndihmuar skuadrën franceze të arrijë edhe një herë finalen e Champions League.

PSG përballet me Bayern Munich në gjysmëfinale të garës më prestigjioze evropiane për klube, ndërsa ndeshja e parë zhvillohet në Paris. Para ndeshjes, Kvaratskhelia është shprehur se luan futboll sepse e do lojën dhe se gjithmonë dëshiron t’u japë tifozëve emocione në fushë. “Unë luaj futboll sepse e dua këtë lojë dhe gjithmonë ndihem i lumtur kur jam në fushë. Dua të jap gjithçka për PSG-në dhe ta ndihmoj skuadrën të arrijë sërish finalen e Champions League”, ka thënë ai. 

Sulmuesi njëzet e pesë vjeçar po kalon sezonin më të mirë të karrierës së tij. Ai ka realizuar pesëmbëdhjetë gola në të gjitha garat, duke kaluar shifrën që kishte arritur me Napolin në sezonin kur fitoi titullin kampion në Itali.

Tetë gola të tij kanë ardhur pikërisht në Champions League, çka tregon rëndësinë që ka pasur në rrugëtimin evropian të PSG-së. Paraqitjet e tij kundër skuadrave të mëdha si Chelsea dhe Liverpool janë vlerësuar shumë nga mediat franceze.

Kvaratskhelia ka thënë se trajneri Luis Enrique e ka ndihmuar të përmirësohet sidomos në aspektin mbrojtës dhe në disiplinën taktike.

PSG tashmë është pranë mbrojtjes së titullit në Francë, por objektivi kryesor mbetet fitimi i Champions League.