Notat e lojtarëve: Inter – Milan, Sanchez më i vlerësuari
Interi ka shënuar fitore të madhe dhe shumë të vështirë ndaj rivalit lokal, Milanit në kuadër të çerekfinales së Kupës së Italisë, shkruan “Zeri.info”.
“Neurazzurët” u kualifikuan në gjysmëfinale pasi triumfuan me rezultat 2:1 ndaj “Rossonerëve”.
Sajti i njohur “SofaScore” ka publikuar notat e futbollistëve në këtë ndeshje dhe më i vlerësuari ishte kiliani, Alexis Sanchez me notën 7.8.
Me notë të madhe te “Zikaltrit” u vlerësua edhe serbi, Kolarov me 7.7 si dhe Barella që mori notën 7.5.
Eriksen që realizoi në minutën e 98-të për kualifikimin e Interit mori notën 7.3.
Te “Kuqezinjtë” figura “tragjike” ishte Ibrahimoviq që u ndëshkua me karton të kuq. Suedezi u vlerësua me notën 6.4, njëjtë sikurse Simon Kjaer.
Milani ishte i pari që kaloi në avantazh me sulmuesin Zlatan Ibrahimoviq pas gjysmë ore lojë.
Por, punët filluan të përkeqësohen për ta, kur i njëjti futbollist u ndëshkua me karton të kuq, pas dy të verdhëve në minutën e 58-të.
Lukaku barazoi në të 71-tën përmes 11 metërshit.
Kur të gjithë po bëheshin gati të shkojnë në vazhdime për t’u përcaktuar fituesi në këtë përballje, doli në skenë i shumëkritikuari, Christian Eriksen me një super-gol nga gjuajtja e lirë në minutën e 98-të për të shpërthyer në festë “zikaltrit”.
Interi në gjysmëfinale do të takohet me fituesin e ndeshjes Juventus – SPAL. /Zeri.info
