Sulmi fizik ndaj gjyqtarit Meriton Berisha, arrestohen tre persona

Tre persona janë arrestuar pas sulmit fizik kundër gjyqtarit anësor, Meriton Berisha, gjatë një ndeshje të Superligës mes Gjilanit dhe Llapit të mërkurën, njofton Policia e Kosovës.

Berisha u sulmua fizikisht nga disa persona menjëherë pas fitores së Gjilanit 3:0 kundër Llapit të mërkurën pasdite në Gjilan. Sulmi ndaj gjyqtarit anësor u konfirmuar edhe nga trajneri i Llapit, Tahir Batatina, pas ndeshjes.

Policia e Kosovës ka konfirmuar se i ka arrestuar tre të dyshuar për sulmin, të cilët janë dërguar në mbajtje.

“Janë arrestuar tre të dyshuar meshkuj K-Shqiptar, pasi që të njëjtit kanë sulmuar fizikisht gjyqtarin e ndeshjes viktimën mashkull K-Shqiptar. Viktima ka pranuar tretman mjekësor. Me vendim të prokurorit të dyshuarit janë dërguar në mbajtje”, thuhet në njoftimin e Policisë së Kosovës.

Sulmi ndaj Berishës erdhi në një kohë kur disa klube kosovare, përfshirë Feronikelin, Llapin dhe Ballkanin, janë ngritur në këmbë kundër gjyqtarëve të Superligës.

Klubi i Gjilanit u distancua nga sulmi dhe kërkoj falje, pasi Berisha u sulmua në stadiumin e tij në Gjilan, duke u zotuar për masa parandaluese në të ardhmen.