Terapitë gjenetike po japin shpresë për fëmijët me humbje dëgjimi

Shkencëtarët në SHBA po zhvillojnë terapi të avancuara gjenetike që synojnë rikthimin e dëgjimit tek fëmijët me forma të rralla të shurdhimit të lindur, duke hapur perspektiva të reja për trajtimin e humbjes së dëgjimit.

Terapitë po testohen tek pacientë që kanë mutacione gjenetike që pengojnë funksionimin normal të qelizave të dëgjimit në veshin e brendshëm, shkruan Reuters, transmeton Gazeta Shneta.

Sipas rezultateve të para klinike, disa fëmijë kanë treguar përmirësime të konsiderueshme në aftësinë për të dëgjuar dhe për të reaguar ndaj tingujve pas injektimit të gjeneve funksionale direkt në veshin e brendshëm. Në disa raste, pacientët kanë arritur të njohin zëra dhe tinguj që më parë nuk i perceptonin fare.

Ekspertët vlerësojnë se kjo qasje mund të shënojë një ndryshim të madh në mjekësinë e dëgjimit, pasi terapitë synojnë vetë shkakun gjenetik të sëmundjes dhe jo vetëm menaxhimin e simptomave me aparate dëgjimi apo implante kokleare.

Megjithatë, studiuesit paralajmërojnë se trajtimet janë ende në faza eksperimentale dhe nevojiten vite monitorimi për të konfirmuar sigurinë dhe efektivitetin afatgjatë. Ata theksojnë se rezultatet aktuale janë premtuese, por terapia nuk është ende e gatshme për përdorim të gjerë klinik.